Shillong, Nohprah 04
Ka kynhun ïalehkai ka Jylla ka la long ka lahduh ha ka 68th National School Games U-17 Boys Football Championship, hadien ba ka la lah ban pynliem noh ïa ka Bihar da 1-0 kol ha ka final kaba la long ha ka Sngi Balang ha Jammu & Kashmir.
Kane ka nam jop ka la wan urlong lyngba u Meban Masharing uba la ïoh thep kol ha ka minit kaba 32 kumjuh ban ïohpdiang ïa ka nam Best Player ha kane ka lympung lyngba ka jinglah ban ïalehkai bha.
Ïa kane ka lympung la pynïaid da ka Directorate of Youth Services and Sports jong ka Sorkar Jammu & Kashmir hapoh ka jingkhmih jong ka School Games Federation of India (SGFI).
Kumba ka paw kane ka kynhun ïalehkai ka Jylla hapoh ka jingïalam u Bah Khlaiñ Pyrkhat Syiemlieh ka la lah ban pynpaw ïa ka jingtbit naduh kaba sdang jong ka lympung namar ka la jop haduh 4-0 kol ïa ka NVS Jharkhand, kumjuh 5-1 kol ïa ka Delhi, 6-3 kol ïa ka CISE Delhi, 3-0 kol ïa ka CBSE Bangalore.
Ha ka Pre-quarter final, katei ka kynhun ka la lah ban pynliem ïa ka Madhya Pradesh da 3-0 kol, kumjuh ha ka quarter final ka la lah ban pynliem da 3-0 kol ïa ka Assam bad ha ka semi final ka la jop da 2-0 kol ïa ka Bengal.
