Bertina Lyngdoh
Shano kito ki por ha kaba ka mariang bad ki jing-thung jingtep, u soh u pai, kiba mih na ka, ba briew u im ha ka. Ki por ba mynshuwa ka long ki por ka jingkhuid jingsuba, khamtam ka bam ka dih kaba mih na ka meimariang. Ym tang ka bam ka dih kaba khuid ba suba hynrei wat ki briew ruh ki long ki bakhuid jan ha baroh ki liang. Katba nang ïaid ki snem ki por, ki sngi, ba pyrthei te ka la stad bad shemphang bha, kumta ruh ki jhur ki jhep ki soh ki pai ki la san kloi bha da kaba ber bad pyndonkam da ki dawai dashin. Dei na kane ki briew kim koit kim khiah bha shuh kumba long ki longshuwa manshuwa jong ngi.
Te kumta, da ka jingbym khuid shuh ha ka bam ka dih, u briew u la hap ban ïada noh ïalade da ki tika injection kata ban lait na ki jingpang jingshitom. Naduh dang kha bad kumta terter, don jait-pa-jait ki tika ïada na ki jingpang jingshitom. ka ktien nongwei ka ong, ba ka jingïada ka kham bha ïa ka jingpynkhiah kumta ruh ki ngeit ba ki tika ki kham bha ban ïa ka jingpynkhiah. Namarkata, ka tnat ka koit ka khiah, ka bthah ba ka bha ban ïada ïalade da ki tika ban kiar na kano-kano ka pang ka shi-tom. Sngewsih pat ban ong ba ki jingai tika hap ban da pynbor, bad ka jingai ïa ki tika kam da don kata ka jingpeit pyrman bha ïa ka koit ka khiah i khyllung shuwa ban ai ïa ki tika. Ka long ruh kaba pynsngewsih bha namar ki khyllung ki hap ban shah lai saw thyrnia shisien ai ban ïada na ki jait jingpang kiba bun. Ka jingpang kam dei tang ki khyllung kiba hap ban mad hynrei ka long ruh kaba pang nud ïa ki kmie ki kpa ban ïohi ba ki khun jong ki, ki hap ban shah dung lai saw thyrnia shisien wat haduh bun ki khyllung kim lait ang ban ïam ruh. La ngeit ne ym ngeit ba ka koit ka khiah hi ka shong ha ka met briew. lada u koit u khiah hi, khlem ki tika ruh u long uba koit ba khiah. Hynrei lada u long pat u bym koit bym khiah, La sumar sa katba sumar ruh un dang kit hi ïa ka pang ka shitom.
Kumta, balei ka tnat ka koit ka khiah khamtam jong ki sorkar kam lah ban pynbiang ïa ki tika kiba dei beit tang shi thyrnia ha ka jaka lai saw thyrnia. Kynmaw ruh ba kaei-kaei kaba shu pynbor kam ju long kaba bha. Ieh ha ki kmie ki kpa ba kin sngewthuh ïa kata, namar lada kumno-kumno ruh ha kaba khatduh dei ka jingbahkhlieh jong ki hi. Kum ki nongsumar wat shu trei tang namar ka pisa ne tulop sorkar, hynrei trei ban shakri hok ïa u paid ba bun balang. Kum ki doktor ki nos bym da nang bad thikna bha ban sumar ka bha ban phah peit ha kiba la nang bha ban sumar. Wat ai ba kan lam sha ka jingsngewsih, tang namar ka jingbakla ban sumar.
