Khliehriat, Nohprah 06
Namar ka jingpyntrei ka dang ïaid shakhmat bad ruh ban lait na ka jingdheng kali, u District Magistrate ka East Jaiñtia Hills u la pyntreikam da ka Section 163 Bharatiya Nagarik Suraksha Sanhita, 2023 ban khang pyrshah ïa ka leit ka wan ki kali heh naduh Tuber shaduh Ratacherra lyngba ka surokbah NH-6.
Katkum ka hukum kaba la pynmih ha ka 6 tarik Nohprah, la ong ba la khang pyrshah ïa ki kali rit kumjuh ki kali heh ban knieh ïaid shakhmat ne ‘Overtaking’ naduh Tuber haduh Ratacherra ha ka surokbah NH-6.
Nalorkata, ban pyntikna ïa ka jingshngaiñ ki paidbah, u la khang pyrshah ïa ki kali naduh kiba heh haduh kiba rit ban ñiah khlem akor ne pynher sted haba ñiah kali.
Kane ka hukum kan treikam noh mardor tad haduh ban da pynmih da kawei pat ka hukum.
