Shillong, Nohprah 06
U MLA ka BJP na South Shillong, Bah Sanbor Shullai, u la ong ba naduh khyrdop dei ban talasi lut ïa ki kali kiba wan rung sha ka Jylla kynthup ïa ka kali u Myntri Rangbah, ki Myntri Sorkar, kali MLA, kali shipai bad pulit nalor ki kali jong ki ‘riew paidbah ban khanglad ïa ka jingpynpoi ïa u drok sha ka Jylla.
“Wat na ki shipai ruh la ïoh kem drok, na katto-katne ki pulit ruh la ïoh ban kem drok. Ki la donkti ha ki kam khaïi drok. Lada bteng beit haduh shisnem ban talasi bad khynra ïa ki kali kiba wan rung sha ka Jylla ym don drok shuh hangne”, la ong u Bah Sanbor.
U la ong ba ka jingdonkam ban khynra ïa ki kali naduh ki khyrdop ka long namar baroh ki tip ba ïa u drok la shalan na shabar kum na Myanmar bad Manipur.
Kumta u Bah Sanbor ha ka Sngi Thohdieng u la lum ïa ka jingïalang ba ar ban ïathir na ka bynta ki lad ki lynti ban ïakhun thma pyrshah ïa u drok bad ki kam sniew ba mih na u drok. Nangta u la ïathuh ba ha ka jingïalang ba nyngkong kaba la long ar bnai ei-ei mynshwa ka dei hapoh jaka Cantonment, Jhalupara bad hynne ka sngi ka jingïalang ka long ban ïakren ha kaba ïadei bad ki jaka ba hap hapoh ka Municipal.
U la ong ba kane ka jingïalang ka long hadien ba la ïohi ïa ki jingsniew kiba mih na u drok kaba la ktah ïa ka imlang sahlang, haduh ba ki runar ïa kiba la suba ba ki dei ki nongdih drok kim riej shuh wat ban tuh na ki ïingmane.
U la ïathuh ba ha kane ka sngi la rai ban pynlong da ka jingkhynra ba kyndit da ka jingïatreilang ki dorbar shnong, ki seng kynthei ryngkat ki pulit.
“Ki dorbar shnong ki dei ban thaw ïa ki VDP bad Civil Task Force ban ithuh da ka ophis jong ka DC. Ki paidbah ruh ki dei ban pyllait por ban ïaid pahara ha ka por mynmiet”, u la ong.
U MLA ka BJP u la kubur ruh ba ka don ka jingduna briew ha ka tnat pulit bad na ka liang ka Sorkar ka la pynkhreh mynta ban pynrung kam haduh kumba 3000 ngut ki pulit hadien ba la ïoh ïa ka mang pisa na ka Sorkar India. Haba kylli, u Bah Sanbor u la ong lada duna ki pulit ban ïaid pahara, ka la don ka jingai jingmut ban thoh sha ka Sorkar Pdeng ban pan jingïarap shuh shuh da ki pulit jong ka Sorkar Pdeng.
“Mar-mar ngin thoh sha ka Delhi ban pynpoi da ki pulit na ka Sorkar Pdeng ban pahara lang bad ki pulit ka Jylla,” u la ong shuh shuh.
Ha kaba ïadei bad ki jaka sumar ïa kiba la ngop ha u drok, u la ïathuh ba ha ka jingïalang kaba la don lang u Myntri Rangbah, u Symbud Myntri Rangbah bad u Myntri ka tnat Social Welfare la rai ban ithuh noh ïa ka jaka ban tei ïa ki jaka sumar jong ka Jylla ha Mawdiangdiang.
“U CM u la bthah ïa ki ophisar ba kin wad ïa ki jaka ha New Shillong bad ha kiwei ki District ka Jylla, hadien ba la ïoh ïa ki jaka, ngin sa leit ïakren ïa u Amit Shah ban ai pisa na ka bynta ban tei ïa ki jaka sumar”, la ong u Bah Sanbor.
