Shillong, Nohprah 06
Ka National People’s Party (NPP) ka la pynbna ïa ka thup kyrteng jong ki kyrtong ban aireng ha ka ilekshon sha ar tylli ki Autonomous District Council, KHADC bad JHADC ka ban long ha u snem ban wan.
Ha kane ka jingpynbna kyrtong, u MDC ba mynta na Rambrai-Jyrngam u la shah pynduh tiket bad la bujli noh da u MLA/MDC barim uba dei ruh u kynum, Bah Kimfa S Marbañiang. Nalor kane sa lai tylli ki konstitwensi ba don ki MDC ka NPP ym pat shym la pynbna ïa ki kyrtong ha kane ka thup nyngkong kaba kynthup ïa ka Mawlai, Sohïong bad Jirang.
Ïa ka thup kyrteng ba nyngkong la pyllait paidbah ha ka Sngi Thoh-dieng da u Working Presi -dent ka NPP Meghalaya State Unit, Bah Hamlet-son Dohling ryngkat u Nongaiktien ka NPP, Bah Himalaya M Shangpliang.
Haba pynbna ïa ki kyrtong, u Bah Hamlet-son u la ong ba ka jingjied ïa ki kyrtong da ka seng kam dei da kaba shu mon tang da uwei lane ar ngut, ne ban shu jied donbor.
“Ngi shim ïa ki kyrteng ba la tyrwa da ki unit bad ki block bad hadien ka poi sha ka district ban mynjur bad ïa ka rai ba khatduh la shim da ka state election committee hadien ba la bishar bniah bha”, u la ong.
Ka NPP kaba ïalam ïa ka executive committee ha baroh ar tylli ki district council, ka don 16 ngut ki MDC ha KHADC bad 19 ngut ha JHADC.
Napdeng kine ki kyrtong, 9 ngut ki dei ki MDC ba mynta jong ka Council kiba kynthup ïa u Chief Executive Member (CEM) Bah Pynïaid Sing Syiem bad u Chairman ka Council, Bah Lamphrang Blah.
U Bah Pynïaid uba dei u MDC ka Sohryngkham mynta ka kynti u la mih ban aireng na Nongthymmai.
Kiwei pat ki MDC ba mynta kiba la mih kyrteng ki dei ka Kong Grace Mary Kharpuri na Nongskhen, ka Kong Macdalyne S Mawlong na Umsning, Bah Rangkynsai Kharbuki na Umroi, Bah Alvin K Sawkmie na Mawsynram, Bah Fantin J Lakadong na Laitumkhrah-Malki, Bah Batskhem Ryntathiang na Mairang-Nongkhlaw bad Bah Carnes Sohshang na Mawkyrwat.
Ha kane ka thup jong ki kyrtong ar ngut ki MDC barim ki la mih kyrteng bad kynthup ïa u Bah Donevan Kharwanlang u ban aireng na Sohra bad ka Kong Rona Khymdeit na Nongpoh konstitwensi.
Haba phai pat sha JHADC, ka NPP ka la pynbna kyrtong na bynta 20 tylli ki konstitwensi. Napdeng kine, 12 ngut ki MDC ba mynta kynthup ruh u Chief Executive Member (CEM), Bah Thombor Shiwat bad u Chairman ka Council, Bah Shankey Shangpung.
Ha ka thup kyrtong ka JHADC, ki kyrtong kiba la mih kyrteng ki kynthup ruh 3 ngut ki MDC barim, u Bah Pheinshwa Nanglein na Mynsngat-Khanduli, u Bison Roy Iano na Raliang bad u Bah Hambertus Nongtdu na Sutnga-Nongkhlieh.
