Nongpoh, Nohprah 06
U General Secretary ka Federation of Khasi Jaiñtia & Garo People (FKJGP) Sengkmie, Bah Eddie Newton Lyngdoh ha ka Sngi Thohdieng u la wan ban plie paidbah ïa ka sem ap kali kaba la shna da ka Umdu-Sohkhwai Unit kum shi bynta jong ka jingai sngewbha Khristmas ïa ki paidbah kane ka thaiñ ba kin ïoh pyndonkam ban ap kali bad shong jahthait shipor ban lait na u slap bad ka lyer.
Ha kane ka sngi la wan ban ïadon ryngkat lang da u Bah Luistar Lyngdoh, President ka FKJGP-NKHD, kiwei-kiwei dkhot na ka Sengkmie, ki nongïalam shnong lem bad kitei ki nongïalam jong ka Umdu-Sohkhwai Unit.
Nalor ka jingplie paidbah ïa katei ka sem ap kali, u Bah Eddie Newton Lyngdoh u la ïoh ruh ban pynskhem bad pynbam smai ïa ki nongïalam bathymmai jong ka FKJGP Umdu Sohkhwai Unit hadien ka jingkut noh jong ka samoi treikam jong ki bad ban sdang pat ïa ka samoi treikam kaba thymmai naduh mynta ter-ter haduh u snem 2027.
Haba ai jingkren ha kane ka sngi, u Bah Eddie Newton Lyngdoh u la pynpaw ba ka jinglah jong ka Umdu-Sohkhwai Unit ban shna ïa kane ka sem ap kali kan long ka jingmyntoi bad jingkyrkhu ïa ki paidbah nongshong shnong kane thaiñ bad pynpaw ba ka seng hi, ka dei kaba ïeng na ka bynta ki duk ki rangli bad ka ju hikai ïa ki ba kin ïaid ha ka lynti kaba dei ha ka imlang ka sahlang bad ban ïai kyntiew ïa ka jaidbynriew.
Shuh shuh, u Bah Eddie Newton Lyngdoh, u la buh ruh ka jingkyntu ïa ki nongïalam bathymmai ka Umdu-Sohkhwai Unit ba haba ki leh ïa kino-kino ki kam ba bha, ki dei ban sdang shuwa nyngkong na la ïing la sem bad ha ki shnong ki thaw bad ter-ter ha ka imlang ka sahlang bad ka thaiñ hi baroh kawei.
