Shillong, Nohprah 06
Ka Nongrim Hills SC bad ka Nangkiew Irat SC ki la wan da ka jingmut ban pynliem ïa la ki liang pyrshah ha kaba ka la long ka sngi kaba itynnad jong ka jingwanphai biang da ka jingjop na kine ar tylli klob sha ka OC Blue Shillong Premier League 2024 ha madan ïalehkai SSA First Ground, Polo, ha ka Sngi Thohdieng.
Ka Nongrim Hills ka la pynliem noh ïa ka Langsning FC da 4-3 kol ha ka jingïakhun kaba sdang ha ka jingïalehkai ha shuwa ba 10 ngut ki rangïalehkai ka Nangkiew Irat kin pynliem noh ïa ka Nongthymmai SC da 4-2 kol.
Na ka bynta ka Nongrim Hills ïa ki kol la thep da u Alem Khongwir (3′), u Mebanshan Suting (65′) bad u Glennys Lynrah (87′, 89′) uba la ïoh thep tang katto katne sekhon hadien ba u mih madan. Ki nongthep kol jong ka Langsning ki long u Lamgougin Khongsai (13′), u Daohipaia Rymbai (46′) bad u Enestar Malngiang (83′).
Baroh arliang mamla ha kane jingïalehkai ki la lamkhmat bad jan sha ka jingjop ha ka jingïalehkai, hynrei ka long kaba kongsan bha na ka bynta ka Nongrim Hills, kaba la lamkhmat ha ka jingïalehkai haduh bakut bad ban ïoh lut ïa ki 3 poiñ. Ka Nongrim Hills kam shym la thep wat tang shi kol ruh ha ki lai tylli ki jingïalehkai ba la dep hynrei mynta ka sngi ka la ïoh 4 tylli ki kol pyrshah ïa ka Langsning kaba la bat tang kawei ka ‘clean sheet’ (bym shah thep kol) baroh shi samoi bad kaba la shah thep bun tam ki kol ban ïa kano-kano ka kynhun.
U Alem u la pynliem noh ïa u nongapkol ka Langsning u Rajat Paul Lyngdoh ban thep kol dang kloi hynrei hadien 10 minit u Lamgougin u la ïoh ban pynïakhaid noh ïa ka kol. Kane jingpyrshang jong u Alem ha ka sien nyngkong ka dei na jngai ha kaba ka la leit dei ïa u nar kol bad ka bol ka la wanphai biang sha madan kaba la ailad ïa u ban thep arsien kaba u la lah ban pynkylla.
Nangta ym pat dap shi minit ban sdang ïa ka kylla miet, u John Lalrinawma u la pynphai ïa ka bol na ka bynta u Daohipaia na ka liang kadiang ha ka rukom kaba itynnad bha bad ban thep ïa ka kol na shapoh bad pynlong ïa ka Langsning ban lamkhmat. Hynrei u Mebanshan u la pynïakhaid noh na ka bynta ka Nongrim Hills kumba 20 minit ei-ei hadien da ka kol kaba suki da ka kjat kadiang hynrei kaba la lah pynurlong.
Nalor kane, la ong ha ki 10 minit ba khatduh ki dei por ba hap pynsted ban leh wut-wut ha kaba u Enestar u la thep kol da ka khlieh na ka bol u Roikhihbha Nongtdu ban lamkhmat biang ïa ka Langsning da shi kol. Kham hadien, u Glennys u la pynphai kylla ïa ka jingïalehkai da kaba thep kol ym slem hadien 60 sekhon ei-ei hadien ba u la wan kum u rangïalehkai bujli bad nangta u la thep kol ha ka minit kaba 89 ban ai syndon ïa ka Nongrim Hills ka jingjop kaba sah jingkynmaw.
Hadien kata, ha kawei pat ka jingïalehkai hapdeng ka jingïakhun ka Nangkiew Irat pyrshah ïa ka Nongthymmai. Ki kol na ka bynta ka Nangkiew Irat la thep da u Wallamsuk Nongkhlaw (54′, 80′) bad u Ronaldkydon L Nonglait (70′, 90′) katba na ka bynta ka Nongthymmai ki kol la thep da u Ronald Singh Shaikom (44′) bad u Sorokhaibam Meitei (61′).
U Ronald u la ïoh ban thep kol shuwa ban kut ka kylla miet ban pynlong ïa ka Nongthymmai ban lamkhmat tang hynrei ka jingbakla kaba paw shynna na u Nitish Hazra ha ka kylla miet ka la pynlong ïa u rangïalehkai ba shadien ba u la kynjat beit beit ïa ka free-kick sha u Atlanson Kharmaw ka Nangkiew Irat, uba la pynphai sha u Wallamsuk bad u la lah ban pynïakhaid kaba long ka kol ba nyngkong jong ka sngi.
Nangta u Sorokhaibam u la ïakhun tyngeh ban pynlah biang ïa ka Nongthymmai ban lamkhmat bad ki la kyrmen ban pynkut noh ïa ka jingïalehkai hadien ba u Restom Khriam u la shah beh na ka bynta ka yellow card ba ar, kaba la pynlong ïa ka Nangkiew Irat ban sah 10 ngut ha ki 25 minit ba khatduh.
Hynrei wat hapdeng ka jingduna ki nongïalehkai ka Nangkiew Irat ka la ïoh ban thep 3 kol. Ka kol khatduh la ïohi ba u nongap kol ka Nongthymmai u Akash Thapa u la mih shabar bad um lah ban pyllait ïa ka kol, kaba la iehnoh ïa u Ronaldkydon ha ka kam kaba suk ban thep ïa ka bol sha ka kol kaba thylli.
Da kane ka jingjop ka la pynlong ïa ka Nangkiew Irat ban kiew sha kyrdan balai ryngkat 12 poiñ. Mynta ki don saw tylli ki klob kiba don mar 7 poiñ, kata naduh ka kyrdan hynriew haduh khyndai. Haba pynshong nongrim ha ka jingïakhun kaba ïakhaid, ka Nongthymmai ka don ha khlieh duh na kine bud sa ka Nongrim Hills, Langsning bad Laitkor SC.
Ki jingïakhun ban wan jong kane lympung kin long biang ha ka Lah Sngi U Blei. Ka Laitkor kan ïakhun pyrshah ïa ka kynhun kaba don sha trai duh ka Ryntih FC ha ka por 11:30 baje mynstep bad bud sa ka Nangkiew Irat pyrshah ïa ka Nongrim Hills ha ka por 2:30 noh phai sngi.
