Nongstoiñ, Nohprah 06
Ka St. Francis De-Sale Umwahlang Parish ka la pynkhreh shaid-shaid na ka bynta ban pdiang ïa ka ‘Eucharistic Procession’ jong ka Nongstoiñ Diocese ka ban sa long ha ka 8 tarik u Nohprah ha ka Madan skul Umwahlang, West Khasi Hills District ha kaba la ong ba la khmih lynti palat 20 hajar ngut eiei ki paid ‘riewngeit kin poi sha kana ka proseshon.
Ha kane ka Eucharistic Procession yn kynthup haduh 22 tylli ki Parish kiba hap hapoh ka Nongstoiñ Dicose Nongstoin.
U Fr. Roy Thomas Parish Priest jong katei ka Parish ha Umwahlang ha ryngkat u Bah Micheal Nongsiej Secretary PPC ki la pyntip ban poi sha katei ka jaka haba khlad noh na ka surok bah Nongstoiñ-Tura kata lyngba ka shnong Riwiang. Na Riwiang ka jngai sa kumba 20 KM ban poi sha ka jaka long jingïaseng bad ka jaka ïeng kali na ka bynta ki ‘riewngeit ki ban wan sha katei ka procession la dep ban pynkhreh.
Shuh shuh ki la kyntu ruh ïa ki paidbah nongwan jingïaseng ba kin long kiba husiar ha ka ñiah kali ban lait na kano-kano ka jingjia sngewsih namar ka surok ka long kaba rit bad khim bha.
Ki la kyntu ruh ba ki paidbah ki dei ban kohnguh ïa ki volunteer bad ïa ki pulit pynïaid kali khnang ba kan ym don kano-kano ka jingthut.
