Shillong, Nohprah 06
U MP ka Lok Sabha na ka Shillong Parliamen-tary Constituency, Dr. Ricky Andrew J. Syngkon u la phah da ka shithi sha u Myntri ka tnat AYUSH ka Sorkar Pdeng, u Jadhav Prata-prao Ganpatrao ha kaba ïadei bad ki jingeh kiba ktah mynta ïa ki Ophisar bad ki nongtrei jong ka AYUSH Medical kiba don hapoh ka National AYUSH Mission (NAM) ha Meghalaya.
Ha katei ka shithi ba la phah da u Dr. Ricky, la ong kaba nyngkong eh ka long ba ki Medical Officer ba la thung ha ki Hospital AYUSH kiba don 10 jingthiah ha ka Jylla, ki la ïoh ïa ka jingsiew kaba la buh thikna kaba long T. 32,000 shibnai. U la ong ba kane ka jingsiew ka long kaba kham duna shibun bad ka bym ïahap ban siew ïa ki Ophisar ka koit ka khiah jong ka AYUSH kiba la thung hapoh ka National Health Mission (NHM), kiba ïoh ïa ka jingsiew kaba sdang kaba long T. 45,500 ha ryngkat bad ka jingpynkiew kaba 5% shisnem.
“Kane ka jingsiew ka long ka bym ïahap bad kaba pynduh mynsiem ïa ki Ophisar Medical kiba trei shitom ban pynthikna ïa ka jingsumar kaba bha ïa ki nongpang”, ong u Dr. Ricky ha katei ka shithi.
Shuh shuh, u Dr. Ricky u la ong ba ki ophisar kiba don ha ki AYUSH kiba don ha ki jaka sumar kiba don 10 jingthiah, ki dei ban trei ïa ki kam baroh 24 kynta, khamtam naduh ba la treikam ïa ka Inpatient Department (IPD).
Ha katei ka shithi, u Dr. Ricky u la ong ruh ba wat hapdeng kane ka kyrdan jong ka jingaiti bad jingkitkhlieh, kitei ki nongsumar kim shah siew satia ka bai lutksan ha kajuh ka kyrdan bad ki paralok jong ki kiba don hapoh ka NHM.
“Nga kwah ban wanrah ha ka jingtip jong phi ba kane ka mat kam pynhiar dor tang ïa ka mynsiem jong ki nongtrei ka koit ka khiah hynrei ka pynkheiñ ruh ïa ka kyndon jong ka riti synshar jong ka ri ban ïoh ïa ka bainong kaba ïaryngkat na ka bynta ki kam kiba ïaryngkat kumba la buh ha ka Article 14 jong ka Riti Synshar ka Ri India (Doctrine of Equality). Ka jingbym ïahap jingsiew kaba mynta hapdeng ki ‘riew shemphang kiba don kajuh ka jingnang jingstad bad kiba trei ka long ka jingpynkheiñ ïa kane ka nongrim bad dei ban pynbeit kyrkieh ban pynthikna ïa ka jinglong hok bad hok ha ka liang ka koit ka khiah”, ong u Dr. Ricky. U Dr. Ricky u la ong ruh ba ka mat ba ar ka long ha kaba ïadei bad ki nongtrei kontrak ba kine ki nongtrei kontrak hapoh ki prokram bapher-bapher jong ka Ri hapoh ka Jylla, ki ïoh ïa ki jingmyntoi kiba kynthup ïa ka jingpynkiew bad ka jingsiew katkum ka jingtrei hynrei ka ïohi ba ki Ophisar ka koit ka khiah jong ka AYUSH bad ki nongtrei kiba trei ha ki jaka sumar kiba don 10 jingthiah, ki shah kyntait na kine ki hok.
“Kane ka jingbym ïaryngkat ka ktah jur ïa ka jinglong bad ka jingtreikam jong ki nongtrei, kaba khanglad ïa ka jinglah jong ki ban treikam ha ka jinglah kaba pura”, bynrap u Dr. Ricky. Ka mat kaba khadduh kaba u Dr. Ricky u la kdew ka long ha kaba ïadei bad ka jingpyrkhat ïa ki Hospital AYUSH kiba don 10 jingthiah kum ki jaka sumar ba tbit tam, kiba ailad ïa ki paidbah ban ïoh ïa ki jingsumar kiba kyrpang bad kiba treikam bha kiba ka rukom sumar AYUSH kan ai. Hynrei u la pynpaw kaba sngewsih pat ka long ba namar ka jingbym don ka jingkyrshan bad jingpynïaid kaba donkam na ki bor ba dei peit, kine ki jaka pule ki la shah khanglad ha ka jinglah jong ki ban treikam bha.
Nalor kata, u Dr. Ricky ha katei ka shithi, u la ong ba ka la don ka jingeh kaba ïai bteng halor ka jingbym biang ki dawai kaba la pynthut jur ïa ka jingtreikam jong kine ki hospital. Kane ka la pynduh mynsiem ïa kiba bun ki nongpang ban wad ïa ki jingshakri ha ka liang ka koit ka khiah kaba la ktah shuh shuh ïa ka jingshaniah bad ka jingtreikam jong kine ki jaka sumar.
“Ka jingpynthikna ia ka jingpynbiang ia ki dawai man ka por bad kaba biang ka long kaba kongsan ban pynneh ïa ka jingshaniah jong ki nongpang bad ban pynbha ia ka jingtreikam jong ki hospital AYUSH”, ong shuh-shuh katei ka shithi.
