Shillong, Nohprah 06
U President ka Meghalaya Cricket Association (MCA), Nababrata Bhattacharjee, uba shah bynshet kam kum Administrative Manager jong ka kynhun ïalehkai kriket ki kynthei ka ri India, u la shah pynkup burom ha ka Shongknor jong ka Queensland Cricket Board ha ka jingïalang ha Brisbane ha ka Sngi Thohdieng.
Kane ka jingleh burom ka la long ha ka jingïalang ba la pynlong da ka tnad treikam jong ka Indian Consulate General ha Brisbane.
Ha kane ka jingïalang la ïadonlang ka Consul General Neetu Bhagotia, Shongknor jong ka Queensland Cricket Board ka Kirsten Pike bad kiwei nongpynïaid, kynthup ïa ki dkhot pawkhmat jong ki nong India kiba sah shabar ri. Ïa u Bhattacharjee bad u Coach Amol Majumder la ai khublei da ka Pike.
U Bhattacharjee haba kren na ka bynta ka kynhun ïalehkai ka India, u la pynpaw ïa ka jingsngewnguh halor ka jingleh sbun jong ka consulate katba ka kapten ka Harmanpreet Kaur ka la ai ïa ka sopti ïalehkai jong ka India ba la soi da baroh ki nongïalehkai sha ka Consul General.
Ka kynhun ïalehkai jong ki kynthei ka India ka don bynta ha ka jingïalehkai ODI series bad ka Australia. Hynnin ka sngi, ka la shah rem noh ha ka jingïakhun kaba nyngkong da 5 wiket bad kan sa ïalehkai biang ha ka Sngi U Blei.
