Gandhinagar, Nohprah:
Kiba bun na ki nongrep wat lada ka sorkar Gujarat ka la pynbna ïa ka jingïarap pisa da ki klur tyngka hynrei kat haduh mynta ki dang ïai ap ban ïoh ha kaba ki la pynpaw ka jingkyrmen ba kane ka lad jingïarap jong ka sorkar kan poi sha ki kumba la kular.
Kiba bun na ki nong-rep kiba la mad ïa ka jingduhnong, namar ka jingjur jong u slap, uba la lynshop ïa kiba bun ki bynta jong ka jylla, ha u Nailar jong une u snem ba mynta. Katba ïa ka T.1,097.31 klur yn siew na ka State Disaster Response Fund (SDRF), ka sorkar jylla kan siew T.322.33 klur na ka mang tyngka, la ong ka jingthoh ba la phah da ki heh sorkar.
Ïa kane ka jingïarap la pynbna hadien ba la pynlong ïa ka jingjurip bniah halor ki jingduhnong ha ki 136 tylli ki thaiñ jong ki 20 tylli ki distrik kiba la shah ktah jur, kum ka Panchmahal, Surendranagar, Navsari, Devbhumi Dwarka, Kheda, Anand, Bharuch, Vadodara, Morbi, Jamtaho, Jamnagar, , Dang, Ahmedabad, Rajkot, Junagadh, Surat, Patan bad Chhotaudepur.
Ha baroh, ki la don kumba 7 lak ngut ki nongrep na kylleng ki 6,812 tylli ki shnong ha kine ki 20 tylli ki distrik ki ban ïoh jingïarap na ka bynta ka jingduhnong jong ki na ki jingshah pynjulor jong ki jingthung jingtep ha u slap uba jur ha u bnai Nailar, la ong ka jingthoh.
Hapoh kane ka song tyngka, ki nongrep kiba la duhnong da lane palat 33 percent na baroh ki jingthung ba mih ha ka aïom Lyiur kin ïoh da T.11,000 ha ka shi hectare ha kaba ar hectare la buh katban biang kumba la buh pud.
Ka jingsiew bai lutksan kan long T.22,000 shi hectare, ryngkat bad ka jingbuh pud kaba ar hectare, halor ka jingjulor jong ki jingthung jingtep kiba donkam um.
Na ka bynta ki jingthung Horticulture ba man la u snem kiba im tang shi aïom thung, ka sorkar ka la buh ïa ka jingsiew bai lutksan kaba T.22,000 shi hectare da kajuh ka jingbuh pud halor ka ar hectare, lada ka jingduhnong ka long mar katjuh ne kaba palat ïa ka 33 per cent.
Ka jingsiew bai lutksan kan long T.22,500 shi hectare ha kaba ïadei bad ki jingthung jingtep kiba im haduh lai tylli ne palat ki aïom thung, la ong ka jingpynbna bad bynrap ba ki nongrep kiba dei hok ban ïoh jingïarap ki donkam ban leit mih sha ki eGram Centre ha ryngkat ki kot ki sla donkam ban aply na ka bynta jong ka.
Ki nongrep ki la kyrpad ïa ka sorkar ba kan buh hakhmat ha kaba ïadei bad ki mat ba ïadei bad ki khnang ba kin lah ban sdang ïa ka kam rep jong ki ha ka por ba dei ki aïom thung ne bet.
