Amlarem, Nohprah 08
Ka Sohlawiat SC ka la ïoh jingjop ha ka Upper Division, katba ka YC Moosakhia bad Nongtalang FC ki la jop ha ka Lower Division ba la pynïaid da ka Amlarem Sub Divisional Sports Association (ASSA) ha ka sngi Saitjaiñ ha Mini Stadium Ladjaplem.
Ha ka jingïalehkai jong ka Upper Division, ka Sohlawiat SC ka la pynliem noh ïa ka Namrhen RSC Kudengrim lyngba ka shi kol ba la thep da u Deibor Buam (61).
Ha ki jingïakhun jong ka Lower Division, ka YC Moosakhia ka la pynliem da 3-1 ïa ka Sankhat SC. Ïa kine kol la thep da u Thanda Khongïong (8 & 30) bad ïa kawei pat la thep kham ha shwa da u Pei Phawa (18). Katba ïa ka kol jong ka Sankhat la thep da u Rosel Marak (32).
Ha ka jingïalehkai kaba bud, ka Nongtalang ka la pynliem ïa ka Amtasam SC da 1-0 kol. ïa kane kol la thep da u Tibor Myrchiang ha ka minit kaba 23.
Ha shwa kane, ka jingïalehkai hapdeng ka Padu United pyrshah ïa ka Shkenpyrsit ka la kut ha ka jingïakhaid hadien ba kim shym don ba thep kol.
