California, Nohprah:
Kawei ka nonghikai kaba shah dait lymbit katba ka dang ai jinghikai ha ka kamra klas ka la khlad noh ha ka taiew khatduh jong u Naiwieng. Ia kane ka nonghikai la ju ithuh kum ka Leah Seneng bad ka la don 60 snem ka rta. Kane ka nonghikai ka la khlad noh hadien shi bnai ba ka la shah dait ha ka lymbit katba ka dang don ha katei ka skul ba ka ai jinghikai.
La ong ba ki bor pynïaid katei ka skul ryngkat bad ki para nonghikai ba ju hikai lang bad katei ka nonghikai ha katei ka skul, ki pyntikna ba katei ka nonghikai kaba la don 60 snem ka rta, ba ka dang ai jinghikai ia ki khynnah skul jong ka Bryant Middle School kaba don hapoh Dos Palos ha ka por ba ka la shah dait ha katei ka lymbit.
Katkum ka jing-iathuh jong kitei kiba sakhi, ki la iathuh ba katei ka nonghikai ka dei kaba burom bad ieid ia baroh ki jait jingthaw kiba don jingim bad kumta kam shym beh ne pynthut eiei ia katei ka lymbit wat la ka don hapoh jong ka kamra klas. Hynrei, katei ka nonghikai ka la shim ia katei ka lymbit ban ïoh pyllait sha bar.
Kumta la ong ba ki bor pynïaid ka Dos Palos bad kumjuh ruh ki nongpyniaid jong katei ka skul, ki la pynpaw ia ka jingsngew kyndit bad ka jingsngew duh nong kaba khraw ruh halor ka jingkhlad noh bad ka jingduh noh ia katei ka nonghikai ha kane ka por.
Shuh shuh ruh la ong ba ki tnat ka koit- ka khiah pat ki suba ba katei ka nonghikai ka la shah ktah ha ki jingpang kiba iabit na ka jingshah dait ha kitei ki jait mrad. Ka Centers for Disease Control & Prevention, ka la iathuh ba ka jingpang kaba ju pur bad ktah bha ia ki briew haba ki shah dait ha kitei ki jait mrad ka dei ka jingpang ‘Rabies’.
Namarkata, ka tnat CDC ka la maham ia ki paidbah ba kim dei ban tur ne ktah ia ki lymbit haba ki iohi ne iakynduh badki, namar ki don ia ka jingma ba ki lah ban ioh ia katei ka jait jingpang haba ki shah dait ne shah ksam.
