New Delhi, Nohprah:
Kum shi bynta ban tehlakam ïa ka jingjaboh jong ka lyer, ki la don da ki hajar tylli ki karkhana bad ki jaka shna jingshna kiba don ha ki jylla ha Delhi-NCR kiba la shah khmih bniah da kumba 40 tylli ki kynhun Flying Squads, bad 228 tylli kiwei pat ki jaka ki la ïoh ïa ki shithi ba ki dei ban khang shwa katba 111 tylli ki dang shah khang haduh mynta kum shi bynta ban tehlakam ïa ka jingjaboh jong ka lyer, la ong u Commission on Air Quality Management (CAQM) ha Supreme Court.
Ka kynhun jong ki nongbishar ka la lum jingtip haduh mynta ïa ki rukom pyntreikam ba la phah da ka Commission bad ki jylla ha NCR kiba kynthup ïa ka Haryana, Uttar Pradesh bad Rajasthan ha kaba la ong ba hangne la sakhi ïa ka jingnang khuid shuh shuh jong ka lyer hapoh ka shi taïew ba la pyntreikam pyrkhing ryngkat ka jingbud ryntih ïa ki kyndon.
Ka jingpynshisha ba la phah da u Director jong ka CAQM ha National Capital Region bad ki thaiñ marjan ki la ai ïa ka jingbatai bniah ha kaba ïadei bad ki rukom pyntreikam kiba lyngkot bad kiba kham slem ha ryngkat ka jingïakren bad ki jylla bad kiwei pat ki heh ba dei khmih na ka bynta ban khanglad bad tehlakam ïa ka jingjaboh jong ka lyer.
Ha kaba ïadei bad kane ruh la ïathuh ba ka sorkar kmie ka la pyntip ba kam long kaba suk ban buh ïa ki Thermal Power Plants hajan Delhi-NCR.
Kum shi bynta ban lah ban tehlakam ïa ka jingjaboh jong ka lyer khamtam ha kane ka aïom Tlang, ki heh ba dei khmih na ka por sha ka por ki la buh ryntih ïa ki rukom pyntreikam ha ryngkat ka jingwanrah ïa ki kyndon ban pyntreikam pyrkhing khnang ban lah ban pynshitom ïa kino kino ki kynhun bad ki karkhana kiba leh pyrshah ne kiba pynkheiñ ïa ki kyndon ba la buh da ki bor ba dei khmih.
