Shillong, Nohprah 08
Ka Shillong Lajong Football Club ka la wanphai da ka jingjop ha ka lympung ïalehkai I-League hadien ba la lah ban pynliem noh ïa ka Rajasthan da palat shiteng dorjon (8-0 kol) ha ka Sngi U Blei ha SSA Stadium kaba ha First Ground, Polo.
Kane ka long ka jingjop kaba nyngkong ha la ïing hadien ba ka la ïakhaid ar sien ha ka jingïakhun pyrshah ïa ka Churchill Brothers (2-2) bad ka Inter Kashi (0-0), hynrei ka la shah rem shisien ha ka Dempo (2-0).
Kumba ka paw ha kane ka jingïakhun ki rangïalehkai ka Lajong ki la lah ban pyni ïa ka mynsiem ïakhun naduh kaba sdang ha kaba ka la ïoh ban pynkhih jar nyngkong eh ha ka minit kaba 3 lyngba u Figo Syndai. Hadien katto katne por ka la thep biang ïa ka kol ba ar lyngba u rangïalehkai na Brazil u Douglas Tardin ha ka minit kaba 17.
Hashwa ban kut ka jingïalehkai jong ka kylla step ka Lajong ka la thep biang sa shi kol lyngba uwei pat u rangïalehkai na Brizil u Daniel Goncalves (45+3) na ka bynta ban tam da 3-0 kol na ka daw ka jingbym lah ban pynphai da ka liang pyrshah.
Hadien 4 minit ba la bteng ïa ka jingïakhun jong ka kylla miet, ka Lajong ka la ïoh ei shi kol lyngba ka jingïarap pynthep da u rangïalehkai ka liang pyrshah u Martand Raina (49). U Douglas Tardin u la thep biang sa shi kol ha ka minit kaba 51.
Hapdeng kane ka jingïakhun ka Rajasthan ka la ïarap ban pynthep biang sa shi kol lyngba u Lunkim Seigoulun Khongsai ha ka minit kaba 61. Hadien 5 minit ka Lajong ka la thep biang ïa ka kol kaba hynñiew lyngba ka penalty ba la shut da u Imanol Arana Sadaba (66).
Kumta shwa ban wai artad ka jingïalehkai, u Hardy Nongbri u la thep ïa ka kol khatduh ha ka minit kaba 87 na ka bynta ban pynlong ïa ka Lajong ban jop shisyndon.
Lyngba kane ka jingjop, ka Shillong Lajong ka la kiew shi kyrdan kata sha kaba phra ryngkat 5 point na ki saw sien ïakhun, katba ka Rajasthan (3 point) ka la hiar sha ka kyrdan ba-ar na sha trai.
Te kumta ka Lajong kan pynkhreh biang ïa ka jingïakhun kaba san ha la ïing pyrshah ïa ka Gokulam Kerala ha ka 14 tarik mynta u bnai.
