Jowai, Nohprah 08
Ka Nangbah Mulang ka la lah ban pynthikna ban jam sha ka final jong ka lympung ïalehkai Super Division Football Tournament kaba pynïaid da ka West Jaiñtia District Sports Association, hadien ba ka la lah ban pynliem noh ïa ka Ladthadlaboh da 3-0 kol ha ka qualifier 2 (semi final kaba lai) kaba la long ha ka sngi Saitjaiñ ha Kiang Nangbah Stadium kaba ha Jowai.
Da kane ka nam jop ka Nangbah Mulang kan aireng pyrshah ïa ka Demthring na ka bynta ban ïaknieh ïa ka nam lahduh mynta ka samoi.
Haba phai sha ka jingïalehkai, ka jingïakhun ha ka kylla step ka la long kaba ïakhaid khlem don mano mano ban ïoh pynkhih jar. Dei ha ka kylla miet ka Nangbah Mulang ka la tam shakhmat da shi kol hadien ba la ïarap pynthep da u rangïalehkai ka liang pyrshah u Dangaitlang Mulieh ha ka minit kaba 48.
Baroh arliang ki la pyni ïa ka sur ïalehkai kaba itynnad kaba pynshongshit ïa u paidbah, hynrei ka Nangbah Mulang da ka jingïalehkai bha ka la ïoh biang ban thep ïa ka kol ba ar ha ka minit kaba 85 ka la thep lyngba u Timmy Ryngkhlem bad shwa ban wai ka la thep biang sa shi kol ha ka minit kaba 90+2 lyngba u Niponghi Sumer.
Kum ban shu pynkynmaw, ka Nangbah Mulang ka dei ka kynhun kaba shah pynliem da 1-0 kol ha ka Demthring ha ka qualifier 1, katba ka Ladthadlaboh ka la jop da 2-0 kol ïa ka Wahïajer ha ka eliminator.
