New Delhi, Nohprah:
Kumba la bthah da ka sorkar, ki heh jong ka kynhun National Investigation Agency (NIA) ki dang pynlong ïa ka jingtohkit kaba bniah namar ka ngeit ba ka la don ka jingleh thok ha kaba ïadei bad ka jingpynrung beaiñ ïa ki briew nabar ri, ha kaba ki Muslim kiba dei ki Rohingya bad ki nong Bangladesh ki la rung sha India lyngba ki khappud kiba don ha Assam, Mizoram, Meghalaya bad ka Meghalaya ka la ju pyndonkam da ki sakhi thok ha kaba ïadei bad kaen, la ïathuh ki heh ba dei khmih halor kane ka bynta. Kumjuh la ïoh jingtip na ki kynhun wad bniah jong ka sorkar ba kane ka jingleh thok ha kaba ïadei bad kane ka jingpynrung tuh ïa ki briew sha kane ka ri ka la long na Bengaluru hynrei ki la don ha kylleng ki jaka jong ka ri.
Ki briew ki la donkti ym tang ha ka ban pynrung beaiñ ïa ki Muslim kiba dei ki Rohingya bad ki nong Bangladesh, hynrei ki la ïarap ruh ïa ki ha kaba ki ïohlad ban leit shang sha kylleng ki nongbah khnang ba kin lah ban sah ha kitei ki jaka, la ïathuh ki heh jong ka kynhun wad bniah. Uwei na ki runar uba la donkti ha kum kine ki jait kam u dei uba la tip kyrteng kum Kumkum Ahmed Chaudhury jong ka Bengaluru, kaba la ïarap ha ka ban pynrung beaiñ ïa ki bar ri ha ryngkat ka jingïarap jong u Sahalam Laskar jong ka Jammu bad u Raju Ali, uba dei u nongshong shnong jogn ka Pakistan.
Ka Chaudhury bad u Laskar ki la dei shnong trai na Assam hynrei ki la leh ïa katei ka kam na Bengaluru bad Jammu , la ïathuh u heh jong ka kynhun wad bniah. Kumba la suba la ong ba ka kynhun jong kitei ki runar ka la ïohlad ban pynrung tuh ïa kiba bun ki Rohingya hapoh ka ri ha kine ki khyndiat snem ba la leit.
