Imphal, Nohprah:
Ka Sorkar Assam ka la ai ïa ka thup kyrteng jong ki Kuki kiba wad jaka rieh ha Assam ban aiti sha ka bor ba dei peit jong ka Sorkar Manipur, la ong ka khubor ba la pynmih da ki heh sorkar.
U Myntri Rangbah ka Manipur u N Biren Singh u la bthah ïa ki heh ba dei khmih kiba la buh ha ki distrik bapher bapher kiba don ha khappud bad ka Assam ha ki khyndiat sngi jong ka taïew ba la lah ba kin pynshisha la kitei ki phetwir Kuki la ki dei ne em ki nongshong shnong ba shisha jong katei ka jylla.
Ïa kane ka jingpynshisha la pynlong katkum ka jingbthah jong u Myntri Rangbah ka jylla uba la pynbna kham mynshwa ba kito ki phetwir Kuki kiba la shah beh na Assam kin hap ban leit phai biang sha la ki shnong trai ha Manipur lada ma ki ne ki kpa tymmen jong ki ki la long ki nongshong shnong jong ka jylla shwa u snem 1961.
Kane ka la jia hadien ba u Chief Executive Membar jong ka Karbi Anglong Autonomous Council ha Assam u Tuliram Ronghang u la pynbna ba ki la don kumba 700 ngut ki Kuki-Zo, kiba la wad jaka rieh ha katei ka distrik ha u snem 2023 namar ka jingkulmar ha Manipur, ki la dep ban phah biang.
La pynkynriah noh ïa ki hadien ka jingïakren bad ki nongïalam bad ki kynhun jong ka jaitbynriew Kuki.
U Ronghang u la ong ba ka kynhun ba dei khmih ka la siew ïa ka bai leit bai wan jong ki nongwanphai da ki nongbud pahara.
U heh jong ka kynhun u la ong ruh ba kumba 1,000 ngut ki briew jong ki Kuki-Zo, kynthup kumba 400 tylli ki longïing, ki don mynta ha ki jaka sah ba shipor ha ki thaiñ Singhasan bad ki thaiñ Borjan.
