Bhubaneswar, Nohprah:
Ki heh ba dei khmih hadien ka jingbthah jong ka Sorkar Odisha ki la bteng ban leit khmih bniah ïa ki skul ha ka jylla khnang ban ithuh ïa ki lyngba ki syrnot ba ki dei ban don bad ïoh na ki bor sorkar.
Kine ki skul kiba la ïoh jingbit ne kiba la don ïa ki syrnot katkum ki rukom ba ki dei ban don, kin sa lah ban bteng ai jinghikai ïa ki khynnah.
Ka sorkar ka la bthah ïa ki District Education Officers (DEOs) ba ki dei ban pynshitom pyrshah ïa ki skul ki bym don ïa ki syrnot kum ka jingshah ithuh ne ka Certificate of Recognition (CoR) bad ban phah jingthoh sha ki nongpynïaid skul ha kaba ïadei bad ka jingphah khang ïa ki.
U heh sorkar ha ka jingai jingkren jong u kaba dang shen ha Assembly, u la ong ba ki skul jong ki riew shimet kiba dei ki English Medium kim shym don ïa ki CoR bad la ong ba kine kin sa shah pynshitom katkum ki kyndon ba la buh bad ki DEO ki la shah bthah ba ki dei ban shim ïa ki sienjam ha kaba ïadei bad kane ka bynta.
Kumba la ïohlum jingkheiñ da ka tnat School and Mass Education (SME), la ong ba la don kumba 39 per cent ki skul English Medium jong ki riew shimet ha ka Elementary-Level ha Odisha ki bym shym la ïoh ïa ki CoR na ka sorkar jylla.
Ka Odisha ka la don kumba 1,969 tylli ki skul English Medium jong ki riewshimet ha kaba la pynïoh ïa ka jingnang jingstad sha ki khynnah kiba pule ha ka klas 1 haduh klas 8.
Ha kaba ïadei bad kane, katkum ka jingïohlum jingkheiñ la ong ba ki la don tang kumba 1,204 tylli na kine kiba la don ïa ki CoR, katba kiba dang sah kata ki 765 ki dei ki bym pat shah ithugh.
Kumjuh, ki la don tang kumba 389 tylli ki skul jong ki riewshimet kiba don ha ki kyrdan Secondary Level (Class IX bad X) kiba la ïoh ïa ki CoR jong ki wat lada kiba kum kine ki skul ha ka jylla ki la tam ïa ki 1000 tylli.
Kane ka la buh ïa ki kmie ki kpa jong ki khynnah skul ha ki jingkhuslai naba ka sorkar jylla ka la pynshai ba kiba wan na kito ki skul ki bym don ïa ka CoR kim lah ban leit rung ha Navodaya ne Adarsh Vidyalayas.
Katkum ki kyndon ba la buh da ka sorkar, la ong ba ki khynnah jong ki skul ki bym pat don ïa ki CoR kim lah ban rung ha Jawahar Navodaya Vidyalayas ne Adarsh Vidyalayas katkum ka jingmang ba la buh katkum ka Economically Weaker Sections (EWS).
Ki dkhot jong ka Abhibhabak Mahasangh ki la ong ba wat lada ka Odisha ka la don baroh 6,767 tylli ki skul jong ki riewshimet kiba la shah ithuh da ka tnat SME, ki la don pat tang kumba 2,531 tylli kiba la don ïa ki NOC ha kaba ki la ïoh ban pyntreikam.
Ki skul ki bym don ïa ki CoR bad ki NOC ki la dei ban shah pynshitom, la dawa ki dkhot jong ka Mahasangh.
