Aizawl, Nohprah:
U dkhot ba marwei jong ka Mizoram ha Rajya Sabha, u K Vanlalvena u la pynpaw ïa ka jingduh jingkyrmen hadien ba la pynsangeh noh ïa ka projek surok khappud hapdeng ka Sangau bad ka Saisihchhuah.
Kane ka projek ka long ban pynïasoh ïa ka Lawngtlai distrik kaba don ha South Mizoram bad kawei ka jaka kaba don hajan ka jylla Chin jong ka Myanmar, ong u heh sorkar.
U Myntri ka tnat Development of North Eastern Region (DoNER), u Jyotiraditya Scindia, ha ka jingïalang ban ïamir jingmut ha New Delhi, u la ong ba u Vanlalvena u la kdew ïa ka jingpynsangeh bad ong ba ïa katei ka projek kaba T.66.08 klur ym shym la lah ban pyntreikam namar ba la jied ïa ka Border Road Organization (BRO) kum ka tnad pyntreikam ha ka jaka jong ka Public Work Department (PWD) ka Mizoram, la ong u heh sorkar.
U Vanlalvena u la kynnoh ba ym shym la lah ban sdang ïa katei ka projek surok namar ka jingeh ha ka jingsiew bai lutksan namar ba ka BRO ka la thmu ba katei ka surok kan ïaid lyngba ïa ka shnong Pangkhua.
Hynrei u la ong ba katkum ka jingtyrwa jong ka PWD, katei ka surok kan ym ïaid lyngba katei ka shnong ban lait na kino-kino ki jingsiew bai lutksan.
U MP ka Mizo National Front u la ong ba ïa ka projek surok Sangau sha Saisihchhuah la buh hakhmat eh da u Myntri Rangbah uba ha katei ka por u Zoramthanga ha ka por ba synshar ka seng MNF.
U Vanlalvena u la ong ba ïa ka pisa kaba la dep mang na ka bynta katei ka projek ym dei ban weng noh.
Ha u Nailar, ka sorkar pdeng ka la pyntip hapoh Parliament ba ka pisa kaba T.66.08 klur kaba la mang na ka bynta ka projek surok la weng noh namar ba ka sorkar Mizoram kam shym la lah ban ai jaka khlem jingsiew haduh u bnai Jylliew.
