Amlarem, Nohprah 09
Ka Umladkhur SC bad Dongmihsngi Mupyut ki la ïasam mar shi point ha ka Super Division, katba ka Nongshilliang Pdengshakap bad ACP Padu SC ki la ïoh nam jop ha ka Lower Division Football Tournament ba la pynïaid da ka Amlarem Sub Division Sports Association (ASSA).
Ha ka jingïakhun jong ka Super Division kaba la long ha madan Mini Stadium Ladjaplem ha ka Lah Sngi U Blei, ka jingïalehkai ka la kut da ka jingthep mar 1-1 kol hapdeng ka Umladkhur SC bad ka Dongmihsngi Mupyut.
Ka Dongmihsngi Mupyut ka la pynkhih jar nyngkong eh tang hapoh 5 minit lyngba u Ribatskhem Khyriem, hynrei ka Umladkhur ka la lah ban pynïakhaid kylla ha ka minit kaba 33 lyngba u Juh Buam.
Haba phai sha ka Lower Division, ka Nongshilliang Pdengshakap ka la jop da 3-1 kol ïa ka Amsarim SC. Ïa kine kol la thep da u Albinash Khaii (11) bad Mardiki Khaii (50 & 60).
Ha ka jingïalehkai kaba bud, ACP Padu ka la pynliem ïa ka Darrang da 1-0 kol lyngba u Stevenson Sumer (14).
Ha kawei pat ka jingïalehkai, ka Amjajer Roko bad ka Lumpyngngad LSCC kim shym la lah ban thep kol haduh kaba kut ka jingïalehkai.
