Ka jingieit ba sbun, ka jingieit ba iaishah, ka jingieitt ka jinglen lade, dei hame kein ko khun u blei ba ngi lah ban shem. U blei u la phah ia u khun ba marwei jong u, u jisu kris namar ba u ieit iangi haduh katta katta. Ka jingieit u Trai jong ngi ka dei ka jingieit bymjukut ia kaba ngi lah ruh ban ong ka jingieit bneng. U khun u blei ula wan sha kane ka pyrthei na ka bynta ka jingpynim ia kiba ngeit ha u. Hajar snem mynshuwa, u Khrist ula im kum manga maphi hynrei u im pat na ka bynta ka jingmab, ia ki khun ka balang lane ia kito kiba ngeit ha u, lym ruh u kpa bneng. U Blei ka jingisynei, ka jingmab, ka jingpyniasuk, ka jingpynkhiah, u nongpyntngen, dei ha u khun Blei u Jisu Khrist.
Kumta, ki sngi ka jingrakhie ia ka sngikha u Khrist ka la jan bad ba paid balang ne ki riewngeit ki ap ban ioh rakhe kyrpang ia kane ka sngi. Namar ka sngikha u Khrist, u bnai Nohprah u long uwei na ki bnai uba bunkam bha. Ha une u bnai baroh ki don la ki jong ki jingpynkhreh ia ka jingwan u jisu kris kata khamtam eh ha ka mynsiem. Na rympei iing ki ia mih ban pynkhuid ia ki shnong ki dong, ki kyntoit, ba ka jingrakhie kan long kaba shongkun bha. Ki paid balang ne ki riewngeit kila bunkam bha ban pyniphuh-pyniphieng bad pynlong ia kane ka sngi kaba don burom bad shongkhia bha. kaba diaw pat ka long ba kat nang iaid ki snem ki sur iaroh i;’u Khrist lane ki sur khristmas ki la nang duna ban iohsngew ha iing ha sem ha iew ha hat bad kumta terter. Sa kawei pat kaba pyndiaw ka long ba kum ki paid balang ngi ia pynkhreh ban pynshongkun ia ka sngi kyrpang u Trai khamtam ia ki kam kiba lah ban iohi paw. hynrei ko hynmen ko para hato ngi ju puson mo ba iaki kam paw ba shabar te ngi la pynkhreh katba ka mynsiem pat ngi la pynkhreh ne em pat kata ban pdiang burom ia ka jingwan u Khrist. Lada uba duk u jynjar, u shahthngan, u shitom u pang, bad ba u ioh jingkyrkhu tang ha ka aiom khristmas ne ki riewngeit ne ki paid balang kane kein ka mut ba ngim pat dei kita ki khun ka balang ba shisha ne kiba tip ia ka ktien u blei.
Kumta, to ngin shakri i’u Trai ha manla ki sngi jongngi ym tang ha ka sngi ne aiom khristmas. La kat lah kat iai, leh ia ki kam kiba pynsngewbha shisha i’u blei kata ha manla ki sngi jongngi yn tang ha ki sngi rakhe kyrpang ne ki jingleh niam ba kyrpang. Im ka jingim khristmas kaba man ka sngi khnang ba ngin ioh ban kynshew ia ka spah bneng ruh ka jingieit bneng. Wat pynlong ruh ia kane ka sngi kum ka sngi ka bam ka dih ba sniew ban pynsniew ia kane ka sngi kumjuh ruh iaka longrynieng. Te kumta, khublei khristmas basuk ia phi baroh bad to ieit bad shakri hok i’u Trai. Kynmaw ruh ba u Trai u ieit iangi manla ki khyllipmat jong ngi ym tang ha ka sngi ba la kha ia u.
