Shillong, Nohprah 09
Ka kynhun ïalehkai ka Jylla ka la mih na kane ka nongbah ha ka Lah Sngi U Blei ryngkat ka jingkyrmen bad ka jingangnud jong baroh ki riew ïeid phutbol ka Jylla ban shan-iah tylli ha ki tyrpeng jong ki na ka bynta ka wat khatduh (final round) jong ka Senior Men’s National Football Championship (Santosh Trophy 2024-25), ka ban sdang ha Hyderabad mynta ka taïew.
Ka Meghalaya ka la shah pynïakab ha ka Group-B ryngkat ka Goa, Delhi, Kerala, Tamil Nadu bad Odisha. Te kumta ka Meghalaya kan ïakhun nyngkong pyrshah ïa ka Tamil Nadu ha ka 15 tarik mynta u bnai ha ka por 2:30 nohphai sngi ha Deccan Arena kaba ha Hyderabad.
Ki saw tylli ki kynhun kiba wan ha ki kyrdan ba hakhlieh duh na kawei-pa-kawei ka group kin ïoh rung sha ka quarter final. Kumta ka Meghalaya ka donkam ban ïalehkai bha ha kane ka jingïakhun kumba ka la lah ban pynpaw ïa ka jingtbit ha u snem 2022-23 namar ka la wan ha ka kyrdan ba-ar naba shah rem ha ka Karnataka.
Ka kynhun ïalehkai jong ka Jylla ka la ïoh rung sha ka wat khatduh ha kane ka kynti da kaba long ka kynhun ba ha khlieh duh ha ka Group-E jong ki jingïalehkai ba nyngkong ha kaba ka la jop ar sien bad ïakhaid kawei ha Nalbari, Assam ha u bnai ba la laah.
Ka burom kaba khraw ka leit sha u Bah Hering Shangpliang uba dang-ïai bteng ban shimti kum u coach ïa kane ka kynhun ka ban ïalam sa shisien pat da u Fullmoon Mukhim kum u kapten.
Ha ka jingïalang ha ka step jong ka Lah Sngi U Blei la ïadon lang ki dkhot nongkitkam ka Meghalaya Football Association ba la ïalam da u President Bah Hamlet Dohling nalor u General Secretary Bah Sunesh Syiem, u Vice-President Cliff Nongrum bad u Treasurer Bah Prosper Warjri.
“Ka long ka burom ïa phi ban mihkhmat ïa ka jylla Meghalaya jong ngi,” la ong u Bah Dohling ïa kane kynhun ïalehkai. “Phi don ka jingkyrshan jong ka jylla baroh kawei ha lyndet jong phi bad ngi don ka jingshaniah kaba pura ha phi. Phi la pynpoi ha ka sien kaba nyng-kong ha Assam bad mynta ngi ngeit ba phin ïaid baroh shilynter ha ka sien kaba khatduh. Ngim kwah tang ba phin leh bha hynrei ban jop? Balei ngim lah ban jop? Phi la trei shitom bad lada phi pynneh ïa ka jinglong ryntih bad ka jingïatreilang kam don daw balei ba ngin ym lah ban rah ïa ka trophy.”
Ha kawei pat ka liang u Bah Syiem pat u la ong, “Ngi la ïohi ba phi don ka mynsiem kaba phylla bad phi la trei shitom. Phi donkam ban pynneh ïa kane bad ïa ka jinglong ryntih jong phi kumjuh bad na ka MFA, ngi shaniah shibun ha phi.”
Na ka liang ki nongïalehkai, u Fullmoon uba long ruh u kapten jong ka kynhun haba ki la mad ïa ka jingshah rem ha ka Karnataka da 3-2 kol ha ka phainal jong ka aïom ïalehkai 2022-23, u la kren, da kaba ong ba ki nongïalehkai kin aiti lut ban rah ïa ka nam lahduh ha kane ka kynti kaba mynta.
Ki kyrteng ki rangïalehkai ka Jylla ki long
Goalkeeper: Siwel Rymbai, Rajat Paul Lyngdoh & Lambha-miki Lamare.
Defender: Wanboklang Lyng-khoi, Aibiangmame Nongneng, Donborlang Nongkynrih, Over-kindness L Mawnai, Badondor Marbaniang, Banraplang Pyng-rope & Arlangky Nongsiej.
Midfielder: Baïaikara Swer, Wilbert Marbaniang, Fullmoon Mukhim (C), Damanbhalang Chyne (VC), Fairming Suting, Dibormi Kassar, Kevin Rymbai & Robertson Khongriah.
Forward – Donlad Diengdoh, Deibormame Tongper, Khraw-kupar Jana & Owanijuh Pajuh.
Ki coach ki long u Bah Hering Shangpliang (Head Coach), Dapmon Tariang (Assistant Coach), Amit Rai (Goalkeeping Coach), Freddy Kharpran (Manager), Baïainehlang Bareh (Physio) & Teiborlang Dohling (Official).
