Khliehriat, Nohprah 09
Ka Dhana CSC ka la rung final ha ka lympung ïalehkai Super Division Football Tournament na ka bynta ka 4th Kyrmen Shylla Contribution Trophy ba la pynïaid da ka East Jaiñtia Hills District Football Asscoiation (EJHDFA).
Kane ka la wan urlong hadien ba ka Dhana CSC ka la pynliem noh ïa ka Thangskai Tiger SC da 1-0 kol ha ka jingïakhun semi-final kaba nyngkong ne Qualifier-1 kaba la long ha madan Artificial Turf, Diengshynrum ha ka Lah Sngi U Blei.
Haba phai sha ka jingïakhun, baroh ar tylli ki kynhun la sakhi ba ki la lah ban tehlakam bha ïa ka bol tad haduh ba ka jingïakhun jong ka kylla step ka la kut khlem da lah pynkhih thep kol.
Haba bteng biang ïa ka kylla miet, ki rangïalehkai jong ka Dhana ki la lah ban ïalehkai bha bad ïoh ban thep kol ha ka minit kaba 63 lyngba u Shot Swer bad kane ka kol ka la neh haduh ba kut ka jingïakhun.
Kawei pat ka jingïakhun semi final ba ar ne Eliminator kan long ha ka Sngi Ba-ar hapdeng ka Rymbai Shkenshynriah SC pyrshah ïa ka Sutnga SSCC ha ka por 1 baje mynsngi.
