Shillong, Nohprah 10
Uwei na ki rangïalehkai ba dang 12 snem ka rta na ri lum Garo, u Rikangku D. Sangma u la lah ban pynpaw ïa ka jingtbit da kaba khur ïa ka takma rnong ha ka 39th National Junior Athletics Championship kaba la long ha Bhubaneshwar, Odisha.
U Rikangku uba na ka shnong Karukol Jalaigre bad uba la dang pule ha Karukol Higher Secondary School kaba jngai kumba 5km na Baghmara, u la khur ïa katei ka takma ha ka kyrdan ïalehkai Under-14 Kids Javelin da kaba u la lah ban kawang ha ka jingjngai kaba 51.91M.
Lyngba kane ka jingjop ka la pynlong ïa u ban long u nongïalehkai ba nyngkong eh hadien ki 25 snem ban khur takma ïa ka Jylla ha ka National Level ha ka jingïalehkai Athletics.
Kumba ka paw u khlur ïalehkai barim ka Jylla u Bah Beningstar Lyngkhoi u la long uba khatduh eh ban khur takma ïa ka Jylla ha ka National Level da kaba khur takma rnong ha ka Under-16 Boys jong ka jingïakop mareh kaba 2000M ha u snem 1999.
Ha kine lai bnai, u Rikangku u la ïoh ka jingshah hikai ha u coach u Pleasantly Synnah uba dei ruh u rangïalehkai barim ka Jylla.
