Jowai, Nohprah 10
U MLA ka Jowai, Bah Wailadmiki Shylla ha ka Sngi Ba-ar u la plie ïa ka lympung ïalehkai ‘Thadlas -keiñ Football League 2024-25’ ba la pynïaid da ka Thadlaskeiñ Sports Association (TSA), kawei na ki synjuk ïalehkai hapoh ka Rilum Jaiñtia kaba la pynkhie im hadien bun tylli ki snem ba ka duh ïa ka jingithuh na ka Meghalaya Football Association (MFA) ha u snem 2019.
Dei hadien ba shim khia ki nongshong shnong bad ki ‘riew ïeid phutbol ki la shim ïa ka sien jam ban thaw ïa ka adhoc body bad da ka jingïasoh jong 31 tylli ki klob hapoh ka TSA, ka MFA ka la rai ban weng ïa ka sospon ha u Risaw mynta u snem.
Kumta khlem pynslem ha kane ka kynti ka TSA ka la pynlong ïa ka Football League bad ki don haduh 58 tylli ki kynhun kiba la wan ban ïashim bynta bad la pynlong ha Wahïajer Stadium.
Nalor u MLA, la donlang ruh u MDC ka JHADC Bah Lakhon Dkhar, u District Sports Officer (DSO), West Jaiñ-tia Hills Bah Khroobok Passah, ki nongïalam bad dkhot nongkitkam ka TSA kynthup naduh u Presi-dent Bah Kmenlang Shyl-la, Vice President Bah Ebris Pariat bad Bah Mutshwa Thabah, General Secretary Bah Ebormi Lyngdoh bad kiwei.
U Bah Wailadmiki haba ai jingkren u pynpaw ka jingkmen namar da ka jingkhie im biang ka Thadlaskeiñ Sports Association (TSA) ki klob hapoh ka thaiñ kum ka Mukhla, Ummulong bad kiwei kin lait na ka jingkut lad bad duh jingkyrmen.
U la bynrap ruh ba ki don ki klob na kane ka thaiñ kiba bit-biang ki la pynïasoh ïalade bad ka West Jaiñtia District Sports Association (WJDSA), hynrei kam long pat kaba suk ïa ki ban kiew shaduh Jowai namar ka ktah ïa ka ïoh ka kot jong ka shnong ka thaw.
U MLA u la kyntu ruh ïa ki rangïalehkai ban trei shitom namar ka jingïalehkai phutbol ha kine ki sngi ka dei ka lad kamai ïalade bad ka sorkar jylla ruh ka la pyrshang ban kyntiew ïa ka kam ïalehkai hapoh ka jylla khnang ban ïoh jingïarap ki khun samla bad rangïalehkai ka Jylla.
Nalor ka jingïarap pisa na u MLA ka thaiñ bad Symbud Myntri Rangbah Bah Sniawbhalang Dhar kaba T. 1 lak tyngka sha ka kynhun lahduh, u Bah Wailadmiki ruh u la pynbna ban ïarap ïa ka song pisa T. 50,000 sha ka kynhun kaba wan ba-ar.
Kum ka dak ka jing-sdang ïa ka lympung u MLA u la pynher ïa ka lama jong ka TSA.
Haba phai sha ka jingïalehkai jong ka sngi sdang, ka Jalapang ka la pynjem khnap haduh 9-0 kol ïa ka Takhniang SC. Ar ngut ki rangïalehkai ki la ïoh da ka hat-trick lyngba u Lumlangki Phawa uba la thep kol ha ka minit 17 (P), 40 & 75 bad u Eladmi Lyngdoh ha ka minit 44, 47 & 73. Katba ïa kiwei pat la thep da u Kynmaw Phawa (15), Oliver Pale (30) bad Nangroi Laloo (69).
