Jerusalem, Nohprah:
U Myntri Rangbahduh ka Israel- u Benjamin Netanyahu ha ka Sngi Nyngkong, u la ong ba un ym pynsangeh ïa ka thma ha Gaza katba ki jingpyrshang iakren sangeh thma ba thymmai ki dang ïaid shakhmat.
Haba kren ha ka jing-ialang bad ki nongthoh khubor ha Jerusalem khatsaw bnai naduh ba la ïaid ka thma pyrshah ia ki lehnoh ka Palestine ha Gaza, u la ong ba lada ka Israel kan pynkut noh ia ka thma mynta, ka Hamas kan wanphai biang, kan ioh bor biang ban tei pat bad kan hiar thma biang ia ka Israel da kaba kham tyngeh bad ym lah ban tip ia ki buit- ki bor jong ki lehnoh ynda ki la thmu ban leh da kaba tyngeh ha katei ka por. Namarkata, u la ong ba ka Israel kam treh ban sangeh thma ia mynta shipor.
Shuh shuh ruh u Netanyahu ha katei ka sngi, u la pynpaw biang ia ka thong jong ka Israel ba ka la buh ban pynduh-pyndam noh shisyndon ia katei ka kynhun lehnoh khnang ba kan long ruh ka jingshngaiñ ia ki paidbah Israel ba kin lait na ki jingshah thombor ha ki lehnoh hadien- habud.
Ha kine ki sngi ba la dep, ki la don ki dak ba ka jingïakren ban sangeh thma bad ban pyllait ïa ki nongshah rahbor kaba la pulom da ki bnai, ka lah ban khie im biang bad ban ïoh ïa ka jingjop.
Ka Qatar kum ka nongpyniakren ïasuk ba kongsan, ka la ong ha ka Sngi Saitjaiñ ba ka la don ka jingkyrmen ba thymmai na ka bynta ki jingïakren ba la thaw da ka jingjied ïa u Donald Trump ha America.
Ka tyllong khubor kaba ïajan bad ka kynhun jong ka Hamas, ka la ong ha kajuh ka por ba ka Turkey bad kumjuh ruh ka Egypt bad Qatar ki la “leh ïa ki jingpyrshang kiba dei ban ïaroh ban pynsangeh ïa ka thma,” bad ka jingïakren kaba thymmai ka lah ban sdang shen.
Ha ka Sngi U Blei, u Myntri Rangbah duh, u la iakynduh ia ki bahaiing jong ki nongshah rahbor kiba la set ha Gaza bad u la ong ba ki thma jong ka Israel pyrshah ia ka Hezbollah bad ka Hamas, kan pynsuk ia ka jingiakren ban pyllait ia ki.
Ki nongiakhih, kynthup ia kiba ha iing ha sem jong ki nongshah rahbor, ki la khot bunsien ia ka jingiateh soskular ban pyllait ia ki nongshah rahbor bad ki la kynnoh ba u pynjlan ia ka thma.
Ka thma ha Gaza ka la khie na ka jingshah thombor jong ka Hamas ha ka 7 tarik u Risaw, 2023 kaba la wanrah ia ka jingïap jong 1,208 ngut ki briew nalor kiba bun dei riew paidbah.
Ka jinghiar thma pynphai kylliang jong ka Israel ha Gaza ka la shim ruh ia ka jingim jong 44,758 ngut ki briew nalor kiba bun dei riew paidbah katkum ka jingkheiñ jong ka tnat ka koit ka khiah jong ka Hamas.
