Bengaluru, Nohprah:
U Myntri Rangbah barim jong ka Karnataka, u S.M.Krishna, uba la ai burom ba u la pynkylla ïa ka nongbah Bangalore sha ka nongbah kaba pynmih ïa ki rukom pyntreikam katkum kajuk stad mynta, u la khlad noh hadien ka jingpang kaba la bat slem ïa u. Kumba la ïathuh ka tyllong khubor, la ong ba u la khlad ha ka rta kaba 92 snem ha ka ïingsah jong u kaba don ha Bangalore.
U Myntri Rangbah ka Karnataka, u Priyank Kharge, u la thoh ha ka rynsan X kumne: “Nga sngewsih jur ban tip halor ka jingkhlad noh jong u S.M. Krishna, Myntri Rangbah barim jong ka Karnataka, uba ka jinglong nongïalam bad ka jingshakri paidbah jong u, ka la pynsah ïa ka dak bym lah ban pyndam ha ka jylla bad ka jaitbynriew jong ngi.”
Nalor ba u la shakri kum u Myntri Rangbah ka Karnataka naduh u snem 1999 haduh u snem 2004, une u Myntri barim ka tnat korbar ri u la shah thung ruh kum u Lat ka jylla Maharashtra naduh u snem 2004 haduh u 2008.
Ha ka por ba u Myntri Rangbahduh barim jong ka ri u Manmohan Singh u la bat ïa ka jingsynshar ha ka sien ba ar jong ka kynhun United Progressive Alliance, u la long u Myntri ka tnat korbar ri naduh u snem 2009 haduh 2012.
Ha u snem 2017, u Krishna u la pynkut noh ïa ka jingïadei kaba la neh slem bha bad ka Congress ban pynïasoh sha ka Bharatiya Janata Party.
