Shillong, Nohprah 10
Ki nongtrei jong ka Mawmluh Cherra Cements Limited (MCCL) ki la pdiang ïa ka rai jong ka Kynhun Myntri ban shim ïa ka song pisa da kaba shongthait mon sngewbha (voluntary retirement scheme) namar ym don lad shuh da kumwei pat ban pynim ïa kane ka karkhana pynmih dewbilat.
“Ngi pdiang ïa ka rai jong ka Sorkar Jylla bad ïa ki jnit ki jnat kiba ïadei bad ka song pisa kaba ki nongtrei ki hap ban ïoh yn sa ïakren bad ka management jong ka MCCL,” la ong pynpaw u President ka Mawmluh Cherra Cements Employees Union (MCCEU), Bah Pynskhem Lyngdoh haba ïakren bad u nongai khubor.
U la ong ba ka Union ka ïeng ha ka nongrim ba dei ban pynkhuid ïa ka tulop bad ki jingsiew kiba sahteng ha shwa ban pyntreikam ïa ka skhim shongthait na ka bynta ki nongtrei. U la ong ba ka VRS ka dei ban long 48 bnai na ka bynta baroh ki nongtrei kam pher katno snem ki la trei bad ban thawlad ki jingïarap na ka bynta ki nongtrei kiba shipor jong ka MCCL.
Ka Kynhun Myntri ka la ai jingmynjur ban pyntreikam noh ïa ka skhim shongthait mon sngewbha ïa ki nongtrei bad khang noh ïa ka MCCL kaba don 205 ngut ki nongtrei.
U Myntri Rangbah, Conrad K Sangma u la ong ba ka Sorkar Jylla ka hap ban bei palat T.100 klur ban pynbiang ïa ki jingdonkam kiba ïadei bad ka jingpynwai noh ïa ka MCCL.
