
Shillong, Nohprah 11
U MLA ka BJP napoh ka Jylla, Bah Sanbor Shullai u la kyrpad ïa u Myntri Rangbah ka Assam, u Himanta Biswa Sarma na bynta ka jingtuklar jong u haba ïadei bad ka jingïaid beit ïaid ryntih jong ka jingshalan masi sha ka Jylla (Meghalaya).
“Nga kyrpad ïa ka jingtuklar jong phi na bynta ka jingïaid beit ïaid ryntih jong ka jingshalan ïa ki masi sha Meghalaya na bynta ki nongkhaïi bad ki kali kiba don ïa ki kot ki sla kiba biang kiba la pynbiang da ka bor pynïaid ka Jylla,” ong u Bah Shullai ha ka shithi ba la phah sha u Sarma.
U la pynpaw ba ka Thaiñ Shatei Lam Mihngi ka kynthup ïa ki jaidbynriew bad ki trai-ri trai-muluk bapher-bapher kiba ka rukom bam jong ki ka ïadei bad ka lariti (jong ki) bad ki paidbah kim pyrshah ïa kano-kano ka niam bad kim kwah ruh ban pynmong ïa kino-kino ki jingsngew niam.
Haba phai sha ka jingkhang doh masi ba dang shen ha Assam, u la ong, “Ka la wanrah ïa ka jingkulmar jingmut ha ka Jylla jong ngi bad la pyndonkam da ki seng kiba pyrshah ïa ngi ban ai jingbthah ba ka dei ka ‘agenda’ ba rieh jong ka NDA ban khang doh masi ha ka ri baroh kawei.”
Haba kdew ba wat la ki nongïalam ka Sorkar Pdeng ki la pynshai bunsien ba ka bam ka dih ka dei ka sobjek jong ka Jylla, ha kawei ka liang utei u nongmihkhmat u la ong ba ki seng ba pyrshah ki la shim ïa ka bynta kaba sniew ha ka ban pynsaphriang ïa ki jingtip kiba bakla hapdeng ki jaidbynriew trai-ri trai-muluk jong ka Jylla bad ka thaiñ.
“Ka jingkhang doh masi ha Assam ka la wanrah ka jingsngewkhia ïa ki nongshong shnong ka Meghalaya halor ka jingkiew dor jong ka doh masi namar kane – da kaba buh jingmut ïa ka aïom lehkmen Khristmas bad Snem Thymmai ha ka Jylla. Ki nongkhaïi masi (ba dei hok) jong ka thaiñ na ka por sha ka por ki la pynsngew ïa ki jingeh jong ki ha kaba ïadei bad ka jingwanrah masi na kiwei pat ki Jylla sha Meghalaya na ka bynta ki kam khaïi kiba dei hok, ka rep ka riang bad kiwei-kiwei jingthmu ba ïadei bad kane,” u la ong.
U la pynsngew ruh ba ki nongshong shnong ki kham bun kiba trei ha ka rep ka riang bad ki kam ba ïadei bad ka, ba kynthup ïa ka jingri masi, ki kam ba ïadei bad ka jingpynmih dud, ka rep ka riang kaba khlem ai dawai bad kiwei-kiwei ki kam ri jingri kiba ïadei bad ka ïoh ka kot.
Haba pynpaw ba ki nongkhaïi masi ki la shah ktah lypa namar ka kyndon 7(1), (i), (ii) bad (7) jong ka Assam Cattle Preservation Act, 2021, u Bah Shullai u la ong ruh ba ka dei ka jingshisha ba ka doh masi ka dei kawei na ki jingbam ba kongsan jong ki paidbah ka Jylla bad kumba 60% na ka jingdonkam doh masi ha ka Jylla la pyndap lyngba ka jingwanrah na kiwei pat ki Jylla.
Shuh shuh u la bynrap, “Hynrei baroh ki mat ba la kdew haneng la buh da kaba pyrkhat ïa ka rukom bam jong ki trai-ri trai-muluk ka Meghalaya bad kam don jingïadei eiei bad ka jingsngew niam jong kano-kano ka jaitbynriew bad ki briew hangne kim pyrshah ïa ka jingngeit niam jong kano-kano ka jaidbynriew bad ngi burom ïa ka kolshor bad ki riti-dustur jong kiwei.”