Lahduh ka District Police & Health Department ha ka Inter Office Futsal Tournament

Ka kynhun ïalehkai futsal jong ka District Police West Khasi Hills ha ka liang ki shynrang ka la ïoh ban rah ïa ka nam lahduh ha ka lympung ïalehkai 1st Inter Office Futsal Tournament 2024...

Nongstoiñ, Nohprah 11

Ka kynhun ïalehkai futsal jong ka District Police West Khasi Hills ha ka liang ki shynrang ka la ïoh ban rah ïa ka nam lahduh ha ka lympung ïalehkai 1st Inter Office Futsal Tournament 2024 ba la pynïaid da ka Futsal Association of West Khasi Hills District.

Kane ka nam jop ka la wan hadien ba ka la lah ban pynliem noh da 3-2 kol ïa ka kynhun ïalehkai jong ka Health Department ‘A’ ha ka jingïakhun final kaba la long ha ka Sngi Balang ha madan Leonel Futsal Arena Pyndengrei.

Shuh shuh ha katei ka sngi, ha ka liang ki kynthei pat ka kynhun ïalehkai jong ka Health Department ka la long ka lahduh hadien ba ka la lah ban pynliem noh ïa ka Social Welfare Department da 2-0 kol.

Ha kane ka sngi u Bah Drestar Marngar uwei na ki ‘riew rangbah u la long kum kongsan, ha ka jingdonlang ka Kong Balarina Syiem, DSO West Khasi Hills kum ka kongsan ha ryngkat ki dkhot nongkitkam ka Synjuk bad kiwei kiwei kiba la sam ruh ïa ki khusnam sha ki kynhun kiba la poi sha ka final.