Shillong, Nohprah 12
Ka Shillong Lajong FC kan pynkhreh ïa ka jingïakhun ha la ïing pyrshah ïa ka Gokulam Kerala ha ka sngi Saitjaiñ ha ka por 4:30 janmiet ha SSA Stadium kaba ha First Ground, Polo. Halor kane ka jingïakhun ha ka lympung ïalehkai I-League, ka Lajong ka la pynkhreh ban die ïa ki tiket na ka bynta ki paidbah nongpeitkai naduh ka sngi Thohdieng na ki jaka kiba la dep ban pynkhreh kum na Electronic Centre (Police Bazaar), Cafe Shillong (Laitumkhrah) bad na SSA Stadium Ticket Counter, Polo. Kumba ka paw ka Lajong ka la wanphai da ka jingkhlaiñ bor ha ka jingïalehkai kaba ka la dep ha kaba ka la pynliem ïa ka Rajasthan FC haduh 8-0 kol bad ban jam sha ka kyrdan ba phra ryngkat 5 poiñ na ki saw sien ïakhun. Kumta kane ka kynhun hapoh ka jingïalam u Jose Carlos Rodriguez Hevia ka la khmih lynti ban ïalehkai bha khnang ban ïoh lai poiñ ha shwa ba kan mih pat na la ïing ban leit ïakhun pyrshah ïa ka Delhi FC ha ka 19 tarik.
