Israel, Nohprah:
Ki shipai Israel ha ka Sngi Palei ki la iathuh ba ki la ioh ban leit ther bom haduh 400 sien ther hapoh 48 kynta ba la dep ha ki jaka kongsan jong ki shipai ka Syria. Kane ka long ruh tang hadien katto- katne sngi hadien ba ki lehnoh Syria ki la lah ban pynhiar shuki noh ia u President Bashar al-Assad.
La ong ba ka jingsynshar jong u Assad kaba la ïaid lynti kumba 24 snem mynta, ka la kut kynsan kynsan ha ka Sngi U Blei bad la ong ba ka Israel kaba don ha khappud bad ka Syria ka la phah ïa ki shipai sha ka jaka ba la buh kyrpang ha ka liang mihngi jong ka Golan Heights ba la pynïasoh da ka Israel bad ka la pynjulor kumba 70-80% na ki jingdon jingem ba kongsan jong ka Syria .
Ki thong ba ka Israel ka thmu ban pynjulor ki kynthup ïa 15 tylli ki jhad shipai duriaw ha ki ar tylli ki jaka treikam jong ki shipai duriaw jong ka Syria – ka kad liengsuiñ Al-Bayda bad ka kad liengsuiñ Latakia, ki battery pyrshah liengsuiñ bad ki jaka pynmih tiar ha ka nongbah Damascus bad kiwei kiwei ki nongbah ba kongsan.
Kumta la ong ba da ki phew tylli ki ‘namding duriaw kiba don ka jingjngai kaba 80-190 km ki la shah pynpra. Uwei pa uwei u namding u kit ïa ki jingbthei kiba heh bha, kaba buh jingma ïa ki lieng duriaw jong ki riew paidbah bad ki shipai ha katei ka jaka,” la ong ki shipai.
