
Shillong, Nohprah 12
Ka Smit SC ka la pynjem khnap ïa ka Nongrim Hills SC haduh 7-0 kol ha ka lympung ïalehkai Women’s Football League 2024 ba la pynïaid da ka Shillong Sports Association (SSA) ha ka sngi Palei ha SSA Stadium, Polo.
Ka Makrisha Songthiang ka la thep marwei haduh saw kol ha ka minit kaba 10, 14, 31 & 63, katba ïa ki ar kol la thep da ka Rushia Dkhar (33 & 48) bad kawei pat la thep da ka Manita Khongsit (17).
Ha kawei ka jingïakhun kaba la long kham ha shwa, ka Lumpariang SC ka la pynliem noh ïa ka Rangdajied United FC da 1-0 kol bad ïa kane kol la thep da ka Fragrancy Roiwan ha ka minit kaba 37.
Katba ka Madanryting SC ka la ïasam mar shi poiñ pyrshah ïa ka Kharang SC hadien ba kim shym lah ban thep kol haduh kaba kut ka jingïalehkai.
Ka jingïalehkai ha ka sngi Thohdieng kan long hapdeng ka Laitkor SC pyrshah ïa ka Mawpat SC ha ka por 4 baje janmiet ha madan Third Ground, Polo.