Pynliem u Gukesh ïa u Ding Liren ban long kum lahduh dang khynnah tam ha ka pyrthei

"Nga la ju angnud ïa kane ka khyllipmat la shiphew snem mynta!" u la ong hadien ka jingjop jong u.

Shillong, Nohprah 12

U D. Gukesh u la kylla long u nongjop ba dang khynnah tam ha ka pyrthei hadien ba u la lah ban pynliem noh ïa u Ding Liren na China bad bat ïa ka nam lahduh jong u snem ba la dep ha ka sngi Palei. Kane ka la wan urlong hadien 14 tylli ki jingïakhun kiba kham eh ha kane ka jingïakop kaba la long ha Singapore.

Lyngba kane ka jingjop ka la pynlong ïa u ba um lah khlem da jaw ki ummat. “Wat ïam, ka long kaba bha”, la ong ka sur ha ka dur-khih ba la sam da ka chess.com kaba la pynlong ïa une u nongjop ba thymmai ban khmied la ki khmat shajrong da ka jingphuh samrkhie ryngkat ka jaw ummat na ki khmat jong u.

Ha katei ka jingïakhun final jong ka World Chess Championship, u Gukesh u la ïoh 7.5 poiñ kaba donkam pyrshah ïa ka 6.5 poiñ jong u Liren hadien ba u la jop ïa ka jingïalehkai  khatduh na ki 14 ki jingïalehkai kaba la jan kum ban ïakhaid ha kiba bun ki bynta.

“Nga la ju angnud ïa kane ka khyllipmat la shiphew snem mynta!” u la ong hadien ka jingjop jong u.

Hashwa ka jingjop jong u Gukesh ha ka sngi Palei, u Garry Kasparov ba pawnam jong ka Russia u dei u nongjop ha ka jingïalehkai chess uba dang khynnah tam ha ka pyrthei haba u la jop ïa ka nam lahduh ha ka rta kaba 22 snem, da kaba pynkut noh ïa ka nam ba la bat da u Anatoly Karpov ha u snem 1985.

U Gukesh u la rung sha kane ka jingïalehkai kum u nongïalehkai khynnah tam ban ïakhun ïa ka khusnam jong ka pyrthei hadien ba u la jop ïa ka lympung ïalehkai jong ka Candidates ha kaba sdang jong une u snem.

Kumba ka paw u Gukesh u dei u nong India ba ar hadien u nongïalehkai pawnam u Viswanathan Anand ban rah ïa ka nam lahduh ha ka pyrthei. U Anand, uba dei u nongjop jong ka pyrthei san sien, u la jop khatduh ïa katei ka nam lahduh ha u snem 2013.