Thmu ki pulit ka Odisha ban pynphai ïa ki nongtong dohkha ka Bangladesh

Ki shipai Indian Coast Guard ki la kem ïa kitei ki nongtong dohkha bad ki jhad jong ki ha ka por ba ki leit pahara man ka por ha ka 10 tarik, Nohprah.

New Delhi, Nohprah:

Ïa ki 78 ngut ki nongtong dohkha na Bangladesh, kiba la shah kem ha ki shipai Indian Coast Guard ha kine ki khyndiat sngi ba la leit namar ba ki la wan tong dohkha na ki bynta jong ki um kiba hap hapoh ka ri India, la thmu ban pynphai noh ïa ki sha la ka jong ka ri, namar ba ki jingpyntreikam ha kaba bad ki rukom pynphai biang ïa ki sha la ka jong ka ri, ki dang ïaid mynta, la pynthikna ki pulit jong ka Odisha.

U Deputy Superintendent of Police (DSP) ha Paradip u Santosh Kumar Jena u la pyntip sha ki lad phah khubor ba ki nongtong dohkha hadien ba la aiti sha ki pulit da ki Coast Guard ki la ïaid lyngba ka jingpynshisha kaba bniah.

“La kem hynnin ka sngi ïa 78 ngut ki nongri dohkha na Bangladesh bad la wanrah ïa ki sha Paradip Police Station ban pynshisha. Mynta la pyndep ïa ka kam, bad ki rukom treikam ban phah biang ïa ki sha Bangladesh ki dang ïaid shakhmat,” la ong u DSP Jena, katkum ka tyllong khubor.

Ki shipai Indian Coast Guard ki la kem ïa kitei ki nongtong dohkha bad ki jhad jong ki ha ka por ba ki leit pahara man ka por ha ka 10 tarik, Nohprah.

Ar tylli ki jhad tong dohkha na Bangladesh kiba la tip kyrteng kum ka FV Laila-2 bad FV Meghna-5 ki la shah bat hapoh ki um duriaw jong ka India, hajan u International Maritime Boundary Line (IMBL).  Ki lieng ki don 41 bad 37 ngut ki nongtong dohkha hapoh jong ki.

Ha ka jingpynbna ba la pynbna paidbah, ki Indian Coast Guard ki la batai ïa kane ka jingtreikam kum ka sienjam kaba kongsan bha ban pynneh ïa ka jingshngaiñ ha ki duriaw bad ban khanglad ïa ki kam tong dohkha khlem jingbit ha ki um jong ka ri India.

“Ha ka jingpahara ha shilynter ka IMBL, ka jhad jong ka Coast Guard ka la lap ïa ki kam kiba suba hapoh ki Indian Maritime Zones bad ka la bat ar tylli ki lieng tong dohkha jong ki nong Bangladesh kiba trei ïa ki kam dohkha beaiñ,” la ong ka kyrwoh khubor.

Ïa ki nongtong dohkha ba la shah kem bad ki lieng tong dohkha jong ki la pynpoi sha ka kad liengsuiï Paradip, ha kaba la pynlong ïa ka jingtohkit kaba bniah ha ka jingïatreilang bad ki bor synshar shnong.

Na ka liang jong ki pulit bad ki Coast Guard ki la ïatreilang ban pynshisha ïa ki jingithuh jong kine ki nongtong  dohkha bad pynthikna ba baroh ar tylli ki lieng tong dohkha ki dei kiba la pynrung kyrteng ha Bangladesh.

Katkum ka jingïathuh jong ka tyllong khubor, la ong ba ki bor pynïaid mynta ki dang pyndep ïa ki jingdonkam ban pynthikna ïa ka jingwanphai biang jong ki nongtong dohkha sha la ka jong ka ri.

Kane ka jingjia ka pynpaw ïa ka jingangnud jong ki shipai duriaw jong ka India ban ïada ïa ki pud duriaw jong ka India bad ban weng ïa ki kam bym don jingbit hapoh ki bynta jong ka um jong ka.