Washington, Nohprah:
Katkum ki khubor na ka White House jong ka United States, la ong ba u President Joe Biden u dang buddien bad peit-thuh bha ia ka long ka man ha Bangladesh bad ka America kan shim jingkitkhlieh ruh ban iatreilang bad ka sorkar shipor jong ka Bangladesh na ka bynta ban pynthikna ia ka jing-iada ia ki riewniam bad riewlum rit paid ha katei ka ri. Namar la ong ba ka jinglong-jingman bad ka jingshngaiñ ha Bangladesh ka la sniew haduh katta hadien ba ka Myntri Rangbahduh barim jong katei ka ri ka la hiar shuki noh bad kumta ruh u Biden u la pyntip ba u dang iatreilang bad ka sorkar ba shipor ban kyntiew ia ka jinglah jong ki bor pynjari ain bad ki bor pahara jong ki ban ialeh pyrshah ia ka jingeh. Kumta la ong ba ki bor pyniaid ka US ki la ioh ban iakren bad ban pynbeit lang bad ki nongïalam jong ka Bangladesh ba ka jingïada ïa ki jaitbynriew rit paid bad ki jaitbynriew bapher bapher kiba don ha katei ka ri, khnang ban pyntikna ia ka shongsuk- shongsaiñ jong baroh paidbah nongshong kiba don ha kylleng jong ka ri Bangladesh khlem da kheiñ ne ñiew shiliang ïa kano-kano ruh ka niam ne kyrdan jaitbynriew.
Ha kine ki khyndiat taiew ba la dep, ki nong India- America, ki la pynlong jingïakhih ba jai-jai bad ki jingïaid paidbah ha ki katto katne ki nongbah, kynthup ruh hakhmat ka White House, ha Chicago, New York, SFO, Detroit, Houston bad ha Atlanta, ha kaba ki la dawa ïa u Biden ban ialeh shitom ban tehlakam ia ka jingshah ñion bad jingshah pyni-bor jong ki rit paid kiba don ha katei ka ri.
La ong ba ha ki khyndiat por ba la leit, u Raja Krishnamoorthi, nong India-America uba long u nongialam jong ka Congress, u la kyntu ia ki Myntri jong ka Senate Foreign-Relations Committee ba kin bud-dien bad iarap ban tuklar lem ia ka jingeh jong ka jingshah thombor ki rit paid, khamtam eh ia ki Hindu kiba im bad kiba sah hapoh ka ri Bangladesh.
Namar la ong ba ha katei ka taiew ba la dep, ki paidbah nong India-America kiba bun bha kiba don ha ri US, ki la pynlong ïa ka jingïaid paidbah na White House sha US Capitol ban pyrshah jur ia ka jingkynnoh ba ki rit paid Hindu kiba don ha Bangladesh ki shah thombor bad shah leh ibeiñ bad kitei ki paidbah nongiakhih ki la dawa ia ka US ba ka dei ban tuklar hi noh halor kane ka bynta ban pyntikna ia ka shongsuk- shongsaiñ jong kitei ki paidbah rit paid ha Bangladesh.
