Khang dam ïa ki khappud India-Bangladesh; pynkhlaiñ ïa ki bor pahara – NESO ïa ka Sorkar Pdeng

Ka North East Students' Organisation (NESO) ka la ban jur ïa ka Sorkar India ban khang dam bad pynkhlaiñ ïa ka jingpahara ha ki jaka khappud ka India-Bangladesh khnang ban khang lad ïa kito kiba...

Shillong, Nohprah 13

Ka North East Students’ Organisation (NESO) ka la ban jur ïa ka Sorkar India ban khang dam bad pynkhlaiñ ïa ka jingpahara ha ki jaka khappud ka India-Bangladesh khnang ban khang lad ïa kito kiba thmu ban wan rung be-aiñ shapoh India.

“Ka NESO na ka por sha ka por ka ïai ban ba donkam ban khang dam bad ker ïa ka khappud India-Bangladesh bad ban phah pahara bha da ki shipai khappud ka ri,” ong u Chairman ka NESO, Bah Samuel B. Jyrwa hadien ka jingïalang Executive Council jong ka seng kaba la long ha Guwahati ha ka Sngi Thohdieng.

U Bah Jyrwa u la ong ruh ba Sorkar India ka la shu sngap jar khlem leh eiei haba ïadei bad ka jingwan rung be-aiñ jong ki briew na Bangladesh sha Assam bad kiwei-kiwei ki Jylla jong ka thaiñ Shatei Lam Mihngi.

“Namar ka jinglong-jingman ba mynta ha Bangladesh, ngi ban jur biang ba ka la dei por ïa ka Sorkar India ban pynleit jingmut kyrpang ïa ka khappud India-Bangladesh da kaba khang dam bad pahara bha ïa ka khappud bad ruh ban peitngor ïa baroh ki jaka kiba lait rynghang bad ka Bangladesh ban khang lad ïa ki nongwan rung be-aiñ sha India,” u la ong da kaba bynrap ba ha kumba 11 distrik jong ka Assam, ki trai-ri ki la kylla long ki rit paid.

Halor ka jinglong-jingman ha Manipur, u Bah Jyrwa u la ong ba ka jingïalang ka la poi sha ka rai ba ka kam kaba dang ïaid ban wanrah ïa ka suk ka saiñ ha katei ka Jylla (kaba la sdang da ka NESO ha u snem ba la dep) kan ïai bteng.

“Kane ka Peace Committee kan bteng ban wad ki lad ki lynti ban ïakren bad ki jaidbynriew bapher-bapher kiba shong ba sah ha Manipur khnang ban wanrah biang ïa ka jingsuk ha ka Jylla,” u la ong.

“Ka NESO ka pynpaw ïa ka jingbitar haba ïadei bad ka jingbym leh eiei ka Sorkar India ha kaba kam shym la shim kano-kano ka sienjam wat hadien 18 bnai ka jingïakynad hapoh ka Jylla (Manipur) ban wanrah ïa ka lad jingpynbeit kaba suk-saiñ ha kaba bun kiba lui-lui bad ki samla pule ki mad jingeh,” ong u Chairman.

Na ka liang utei u nongïalam, u la ong ba ka jingïalang ka la kyrshan ruh ïa ka rai ba la shim da ka KSU-NEHU Unit bad NEHUSU halor ki mat bapher-bapher kiba ktah ïa ka NEHU la bun-bun snem mynta.

Shuh shuh u la bynrap, “Ngi la thoh sha u Myntri ka tnad pule-dangle ka Sorkar Pdeng, u Dharmendra Pradhan haba ïadei bad ka mat kaba ktah ïa ka skulbah – kaba ktah pat ïa ki samla pule bad ka jingpule jong ki hajar ngut ki samla kiba pule ha kane ka skulbah.”

Na ka liang u Bah Jyrwa u la ong ba haba ïadei bad ka ‘Assam Accord’, ka seng ka dawa ba ka Sorkar Jylla bad Sorkar Pdeng ki dei ban pyntreikam ïa baroh ki jingai jingmut bad lada hap wanrah jingkylla ha ka Riti Synshar ka Ri, dei ban leh noh mardor namar kane ka mat ka la sahteng la bun-bun snem mynta.