Pynkup burom ka Meghalaya Athletic Association ïa u Rikangku D Sangma

Ka Meghalaya Athletic Association (MAA) ha ka Sngi Thohdieng jong ka taïew, ka la wan shakhmat ban pynkup burom da kaba aiti ïa ka song pisa sha u Rikangku D. Sangma, hadien ba u la...

Shillong, Nohprah 13

Ka Meghalaya Athletic Association (MAA) ha ka Sngi Thohdieng jong ka taïew, ka la wan shakhmat ban pynkup burom da kaba aiti ïa ka song pisa sha u Rikangku D. Sangma, hadien ba u la ïoh khur ïa ka takma rnong na ka 39th  National Junior Athletics Championship, kaba la wan lyngba ka jingïakob jong ka Kids Javelin ha ka jinglah ban kawang 51.91 metre.

Ïa kane jingïalang la pynlong ha conference room jong ka Meghalaya State Olympic Association, J.N Stadium, Polo, ha kaba la sakhi lang da u President jong ka MAA, Bah E.M.H Passah, nangta la ïoh ruh ïa ka jingkren na u Secretary, Bah  Finely L. Pariat bad don lang u Bah Joel Marbaniang, Vice President ka MAA.

U Bah Finely haba ai jingkren ha kane ka jingïalang u pynpaw ïa ka jingkmen ba u Rikangku un kylla long u khynnah ïalehkai athletic ba ar na kane ka jylla ban ïoh khur ïa ka takma na ka National Junior Athletics Championship kaba la wan lyngba ka jingïatreilang bad ka tnat sports ha kaba la sdang pat mynta ban lah ïoh kheit ïa ki soh bathiang.

U Bah Finely um lah ruh khlem da ai khublei ïa ka Kong Daicy Marweiñ kaba dei ka athletic coach jong ka jylla ryngkat u Plesantly Synnah kiba la trei shitom ban hikai ïa u lyngba ka ‘online’ namar u dei uba shong bad sah sha Baghmara, hynrei  kane ka buit ka la lah pat ban pynlong ïa u  ban ïalehkai bha tad haduh ba un da ïoh ban khur ïa kane ka takma.

Shuh shuh u Bah Finely u la kam ba kane ka takma rnong ba la khur da u Rikangku ka long ruh kum ka jingkyrkhu na sha lyndet ïa ka jylla ba kan lah ban sei madan ïa ki khynnah ïalehkai ba kum kine bad bynrap ba wat na ka liang ki briew ka Athletics Federation of India ki la pynpaw ba u Rikangku u dei khynnah ba don bha ka lawei kaba phyrnai tangba kiei-kiei baroh kan shong pat da kumno yn lah shuh shuh ban nang saiñ dur ïa ka jingim ïalehkai ka jong u.