
Nongstoiñ, Nohprah 13
Na ka bynta ban ïaid beit ïaid ryntih jong ki kali bad ka jingshngaiñ jong ki nongïashim bynta ha Mawphanlur Run kaba la tip ruh kum ka Safari Marathon ka ban long mynta ka Sngi Saitjaiñ ka 14 tarik u Nohprah 2024 ha u lum Mawphanlur- Mawthadraishan, u Superintendent of Police ka West Khasi Hills District, Bikram D. Marak, u la pyntip sha ki paidbah ïa ki katto katne ki jingpyntip.
Ha ka kyrwoh khubor, u SP u la ong ba la pynjari ‘No Entry’ ïa baroh ki kali naduh lad Mawphanlur-Mawthadraishan bad naduh Mawphanlur-Lawdisai ha khappud shnong sha lum Mawphanlur.
Nangta, la pynjari ‘No Entry’ ïa baroh ki kali na u lum Mawphanlur sha ki jaka ba pynïasoh Mawphanlur-Mawthadraishan.
Shuh shuh u la ong ruh ïa kine ki jingkhang rung kali ha kitei ki jaka ba la kdew haneng, kin treikam naduh ka por 7.30 mynstep haduh ban da dep ka jingmareh marathon ha kane ka sngi.
U la ong ruh ba ka jingpynbeit jaka ïeng kali na ka bynta ki nongïashim bynta bad ki ophisar yn shah ban ïeng tang ha ki jaka ba la pynbeit kyrpang ha u lum Mawphanlur.
Kumta u la kyrpad ïa ki paidbah ban ïatreilang bad ki jingpynbeit ïa ka leit ka wan khnang ban pynthikna ïa ka jingjop bad jingshngaiñ jong kane ka marathon.