Shillong, Nohprah 13
Ka India ka la shah pynngad ha ka thup kaba kham eh jong ka AFC Asian Cup Saudi Arabia 2027 Qualifiers Final Round ha kaba kane ka kynhun ha ka la don ha ka Group-C kaba kynthup lang ïa ka Hong Kong, Singapore bad Bangladesh.
Ïa kane ka jingpynïakab na ka bynta ki 24 tylli ki kynhun la phiah ha ki hynriew tylli ki group kaba don mar saw tylli ki kynhun, la pynlong ha AFC House ha Kuala Lumpur, Malaysia, ha ka lah sngi U Blei.
Dei tang ki 6 tylli ki kynhun ki ban wan ha ki kyrdan ba hakhlieh jong kitei ki group kin ïoh rung bad ban ïasoh bad ki 18 tylli ki kynhun kiba la dep rung lypa sha ka AFC Asian Cup Saudi Arabia 2027 hadien ka wat kaba ar. Ka wat kaba khatduh jong ka ‘Qualifiers Final Round’ kan long ha ki hynriew sngi ki jingïalehkai ha ka rukom ïalehkai ha ïing bad shabar hapdeng ka 25 tarik u Lber jong u snem 2025 haduh ka 31 tarik u Lber 2026. Te kumta ka India ka la khmih lynti ban ïoh rung sha ka Asian Cup ha ka sien kaba nyngkong, ha kaba kan ïakhun nyngkong ha la ïing pyrshah ïa ka Bangladesh.
Ka India ka la ïakhun ïa baroh lai tylli ki kynhun ka liang pyrshah ha kine ki khyndiat sngi ba la dep. Kane ka kynhun ïalehkai ka ri ka la ïakhun khadduh pyrshah ïa ka Bangladesh ha ka SAFF Champio-nship 2021, ka Hong Kong ha ka AFC Asian Cup Qualifiers ha Kolkata ha u Jylliew 2022, bad ka Singapore ha ka H?ng Th?nh Friendly Tourna-ment ha Vietnam ha u Nailur 2022.
Katkum ka FIFA Rankings kaba la pynmih ha u Naiwieng, ka India ka don ha ka kyrdan kaba 127, ka Hong Kong ka don ha ka kyrdan kaba 156, ka Singapore ka don ha ka kyrdan kaba 161 bad ka Bangladesh ka don ha ka kyrdan kaba 185.
Hadien ka jingïakhaid, u coach jong ka ri u Manolo Márquez, u la ong, “Ngi dei ka kynhun Pot 1 bad ngi donkam ban pyni balei ba ngi dei ki nongshah ban rung sha ka kyrdan. Kam don shibun ki jingiapher hapdeng ki kynhun. Man la ka kynhun ka long kaba eh. Ka Hong Kong ka la pynkhreh bha bad ki nongïalehkai ki long kiba biang pura hapoh ka jingialam u coach u Ashley Westwood, uba ka India ka la ïalehkai pyrshah ha ka World Cup Qualifiers (katba u dangbat ïa ka Afghanistan). Te kumta ngin ïalehkai nyngkong pyrshah ïa ka Bangladesh ha u Lber nyngkong. Ngi don hynriew tylli ki jingïalehkai bad ngi donkam ban long ba ha khlieh duh jong ka kynhun bad ban rung sha ka Asian Cup.”
Ki kynhun kiba don ha ka Group-A ki long ka Tajikistan, Philippines, Maldives & Timor-Leste. Ha ka Group-B ki long ka Lebanon, Yemen, Bhutan & Brunei Darussalam. Ha ka Group-C ki long ka India, HongKong, Singa-pore & Bangladesh. Ha ka Group-D ki long ka Thailand, Turkmenistan, Chinese Taipei & Sri Lanka. Ha ka Group-E ki long ka Syria, Afghanistan, Myanmar & Pakistan. Ha ka Group-F ki long ka Vietnam, Malaysia, Nepal & Laos.
