
Shillong, Nohprah 13
Ka Meghalaya Softball Association ka la sdang ïa ka 4th Senior Softball Championship 2024 ha ka sngi Palei ha Don Bosco Mini Stadium bad kane ka lympung ka long na ka bynta ki khynnah kynthei bad shynrang.
Ha kane ka jingïakob, la wan ïashim bynta da ki 7 tylli ki district ba don ha ka Jylla, ha kaba ka jingpynlong ïa kane ka lympung ka long artad kum shi bynta ka jingpynkhreh ban pynlong ha ka lympung bah ïalehkai ka Jylla, ka 6th Meghalaya Games kaban long ha u snem u ban wan ha Jowai-Wahïajer, West Jaiñtia Hills District.
La plie ïa kane ka lympung da u Principal ka St Anthony’s Higher Secondary School, u Fr. Anthony Kharkongor kum u kongsan, ha kaba la pdiang burom pat da u President u Dr. Aman War bad ka General Secretary Kong Rida Lyndem bad sakhi lang da ki dkhot ka executive committee ka MSA.
Hadien ka jingïalang plie, la sdang pat ka jingïalehkai hapdeng ka Mawkyrwat (South West Khasi Hills) pyrshah ïa ka Dkhiah (East Jaiñtia Hills).