
Shillong, Nohprah 15
Ka Sorkar Jylla ka la ïai bteng ban kyrshan man la u snem ïa ki kolej ki bym dei Sorkar ha kaba kine ki kolej ki don ïa ki nonghikai kiba ïoh tulop na ka Sorkar lyngba ka deficit grant-in-aid. Lada kheiñlang ïa ka jingkyrshan ka sorkar ïa kine ki kolej ka la jan kot T. 40 klur man u snem.
U Nongsaiñ Hima u la wad jingtip kham bniah ban ïoh jingkheiñ ha kaba ïadei bad ka jingbei pisa ka sorkar ïa ki kolej Sorkar bad ïa ka jingpynlut ka Sorkar na ka bynta ki kolej ki bym dei Sorkar tang ban kyrshan siew tulop ïa ki nonghikai.
Katkum ka jingtip kaba la ïohlum da kaba pynshong nongrim na ki kot ki sla kiba pyni ïa ka jingkheiñ jingdiah, la ïohi ba ki don 13 tylli ki kolej shimet ne kolej ki bym dei jong ka Sorkar. Ka jingpynlut na ka bynta kine 13 tylli ki kolej kiba don ha ka thup deficit grant-in-aid man la u snem ka jan kot T. 40 klur, kata T.39,68,52,866.
Ki nonghikai jong kine 13 tylli ki kolej kiba ïoh tulop na ka Sorkar ki donlang kiba ïoh tulop katkum ka UGC scale bad ka state scale.
Ki 13 tylli kolej deficit ha kane ka jylla ki long St. Edmund’s College, Lady Keane College, St. Anthony’s College, Union Christian College, Synod College, St. Mary’s College, Shillong College, Sankardev College, Shillong Commerce College, College of Teacher Education (PGT) Shillong, Don Bosco College Tura, Seng Khasi College, bad Mendipathar College.
Lada phai sha ki kolej Sorkar kiba don 8 tylli, ka jingpynlut ka Sorkar ka kham duna man la u snem. Ka jingpynlut ka Sorkar na ka bynta kine ki kolej Sorkar ka la jan kot T.10 klur, kata, T. 9,27,01,303.
Ki 8 tylli ki kolej Sorkar ki long ka Tura Government College, Kiang Nangbah College, Sohra Government College, College of Teacher Education Rongkhon, Tura, Capt Williamson Memorial Government College, Williamnagar Government College, Rongjeng Model Degree College, bad Patharkhmah Model Degree College.
Ka rukom long ka pule-dangle ha Meghalaya naduh ki skul haduh ki kolej kam long ryntih ha ka rukom pynïaid. Ka rukom ïoh tulop ki nonghikai kam long ryntih bad ka ïapher hapdeng jong ki wat lada ki trei ïa kajuh ka kam.
Ka jingkylli mynta ka long, hato ki nonghikai kiba la ïoh tulop deficit na ka Sorkar ki ïoh leh mon namar ki bor pynïaid jong ki kolej deficit kim nud ban tuklar ïa kine ki nonghikai? Kine ki nonghikai ki la sngew ïalade kum kiba dei jong ka Sorkar ha kaba ka Sorkar ruh kam nud ban leh eiei ïa ki namar ki dei kiba thung da ka management jong ka kolej.
Shuh shuh ka jingkylli ïa kine ki kolej kiba ïoh ïa ka deficit grant-in-aid na ka Sorkar ka long, balei ka bai klas ïa ki samla pule ka rem bha ha kine ki kolej wat haba kine ki kolej ki la dep ïoh jingkyrshan shibun na ka Sorkar Jylla?
Ki kmie ki kpa bad ki samla pule ki hap pynlut da ki phew hajar bad da ki lak ban siew ïa ka bai klas lane bai pule haba leit pule ha kine kolej deficit wat lada ki dei ki kolej kiba la dep ïoh jingkyrshan na ka Sorkar.