
Jowai, Nohprah 15
Ka Nangbah Mulang SC ka la rah biang ïa ka nam lahduh ha ka sien ba ar ha ka lympung ïalehkai Super Division na ka bynta U Kiang Nangbah Memorial Trophy, hadien ba ka la lah ban pynliem ïa ka Demthring SC da 1-0 kol.
Kane ka wan urlong hadien hynriew snem naduh ba ka la rah teng nyngkong ha u snem 2016.
Ïa kane ka jingïakhun final la pynïaid da ka West Jaiñtia District Sports Association (WJD-SA) ha ka Sngi Saitjaiñ ha Kiang Nangbah Stadium. Ka Nangbah Mulang ha kane jingïalehkai ka la tam shakhmat naduh ka kylla step hadien ba ïoh thep kol ha ka minit 12 lyngba u Timmy Ryngkhlem.
Wat hapdeng ki jingpyrshang kaba bun ki kabu ksiar na baroh ar tylli kine ki kynhun, hynrei ym shym la lah ban pynkhih jar.
Da kane ka nam jop ka Nangbah Mulang ka la ïohpdiang ïa ka song pisa kaba T.1 lak bad ka Demthring ka la ïoh rah T.50,000 ryngkat ki trophy kaba la synñiang da u MLA ka Jowai, Bah Wailadmiki Shylla.
Ka nam Top Scorer ka leit sha u Niponghi Sumer na ka Nangbah Mulang, uba la thep 9 kol ha kane ka lympung, kumjuh ïa ka Best Goalkeeper la ïoh da u Ïalamlang Biam jong ka Ladthadlaboh, Man of the Match ka leit sha u Timmy Ryngkhlem jong ka Nangbah Mulang bad Player of the Tournament sha u Wadshwa Lato jong ka Demthring.
Ïa ki khusnam sha ki nongjop la sam da u kongsan Bah Wailadmiki Shylla MLA ka Jowai bad Chairman ka MUDA ha ka jingdonlang u MDC ka JHADC Bah Lakhon Dkhar, u District Sports Officer (DSO), West Jaiñtia Hills Bah Khroobok Passah nalor ki nongïalam bad dkhot nongkitkam ka WJDSA ba kynthup Working President Bah EMH. Passah, Vice Presi-dent Bah Patrick Lamare, Football Secretary Bah Nangebormi Suting.
La donlang ruh ki nongïalam bad dkhot nongkitkam ka East Jaiñ-tia Hills District Football Association, Amlarem Sub Divisional Sports Association bad Saipung Block Sports Association ba kynthup naduh u Bah Mehiwot Shadap, Bah James Sutnga, Bah Rimi Shadap bad Tremendous Tariang nalor kiwei.
Ha katei kajuh ka sngi la pynkup burom ruh ïa ar ngut ki rephri kiba kynthup ïa u Bah Bulmi Phawa uba la pyndep ïa ka National Referee (Level 5) na ka bynta u snem 2023. Uwei pat u dei u rephri basketball u Sebastian Suting. Une u referee u dei uba nyng-kong eh na Jaiñtia Hills ban ïoh ïa ka kyrdan Panel B BFI Referee.