Moscow, Nohprah:
Namar ba ka jingïadei hapdeng jong ka Russia bad ka US ka la sniew haduh katta-katta bad la i kumba ka kham sniew shuh shuh ban ïa kaba ju long ha ki por ka jing-iather namding bad ka Cuba ha u snem 1962 ha kaba ka Ukraine bad ka Russia ki la jan poi sha ka jingiakynad kaba jur bha ha kane ka por bad ka la jan poi sha ka thma nuclear kaba shyrkhei bad kaba lah ban pyn-um ia ka pyrthei baroh kawei.
Kumta, la ong ba ka Russia ka la maham ïa la ki nongshong shnong ba kim dei ban leit jngoh ne leit shangkai shuh sha US namar ba ka jingïadei hapdeng ka Russia bad ka United States kam long shuh kaba bit ban dang iatreilang bad ban ia rung ia mih ioh ka jingeh kan wan lap ia ki ha kano kano ka por ba ki leit sha katei ka ri kaba pyrshah jur ia ka jingleit hiar thma jong ka Russia sha Ukraine.
Ka Maria Zakharova, nongai-ktien jong ka tnad kam bar ri, ka la pynmih ia kane ka jingmaham lyngba ka jingialang pathai khubor ha ka Sngi Thohdieng ban maham ia ki paidbah nong Russia ba kim dei shuh ban leit rung ne wan sha US ioh ki lah ban shah pharep bad shah pynngat kyndon pynban ha ka US bad ki lah ruh ban mih da kiwei pat ki jingeh kiba lah ban ktah ia ka jing-leit-jingwan jong ki.
Shuh shuh ruh la ong ba ka la maham ia ki paidbah nongshong shnong ka Russia ba kin kiar na kaba leit sha Canada bad sha ki paralok jong ka US kiba don hapoh jong ka European Union da kaba ong ba ki bor pyniaid ka Russia ki la kyntu ïa ki paidbah ba kin ïai bteng ban kiar na ka leit sha United States bad sha ki ri ba ju iadei kam bad kiba iatrei -lang bad ka, kynthup nyngkong eh ia ka Canada, hynrei lait noh tang ia katto-katne ki ri jong ka Union Europe ki bym da iatreilang bad ka US lane Ukraine.
Ha kajuh ka rukom, ka US ka la pynmih ïa ka jingpynbna sha ki nongshong shnong jong ka ba kin hap ban kiar noh na ka jingleit-jingwan sha Russia da kaba maham ruh ba ki lah ban mad ïa ka jingshah pyndik ne jingshah bat ha ki bor pahara.
Ka US ka la kyrshan ia ka Ukraine da kaba phah jingiarap sha ka tnat shipai jong ka haduh kumba $62 billion naduh ba sdang jong ka thma ha u bnai Rymphang jong u snem 2022 bad kaba ka US ka dang iai bteng haduh kine ki sngi phah jingïarap bad ban ai jingkyrshan katba lah ia ka Ukraine shuwa ba u Biden un mih noh na ka kam bad un aiti noh ia ka shuki President ha u Donald Trump uba la jied da ka United States bad u ban sdang shong noh ha ka ophis treikam u President ka US naduh u Kyllalyngkot jong une u snem u ban wan.
Nalor kata, ka US mynta ka la aiti ïa ka ram kaba $20 billion sha ka Ukraine, ha kaba u President Biden u la ong ba “yn siew biang da ka sut kaba la ïoh na ki marpoh khyndew jong ka Russia kiba khlem pynkhih”.
Namar la ong ba kane ka ram kan long ka jingkyrshan ïa ki paidbah nongshong shnong ka Ukraine katba ki dang ïada bad tei pat ïa la ka ri bad ka jingpyrshang jong ka US.
Ha kano-kano ka rukom, ka White House ka pynpaw ba ka iada tang ia la ka jong ka jingmyntoi da kaba pynbiang ia ki tiar ialeh sha ka Ukraine katba ka Russia ka ong ba ka US ka shu pyndonkam ia ka Ukraine ban pyntlot bad ha kaba kut ban pynjot ia ka Russia.
