Pynïakhaid u Damanbhalang ïa ka Meghalaya pyrshah ïa ka Tamil Nadu

Kane ka jinglah ban pynïakhaid ka la wan urlong lyngba u Damanbhalang Chyne hadien ba ka liang pyrshah ka la thep ar kol ha ka kylla step.

Shillong, Nohprah 15

Ka kynhun ïalehkai ka Jylla ka la ïasam mar shi poiñ bad ka Tamil Nadu ha ka jingïakhun kaba nyng-kong jong ka wat khatduh ha ka Senior Men’s National Football Championship na ka bynta ka Santosh Trophy 2024-25. Kane ka long hadien ba ki la ïakhaid mar 2-2 kol ha ka Sngi U Blei ha Hyderabad.

Kane ka jinglah ban pynïakhaid ka la wan urlong lyngba u Damanbhalang Chyne hadien ba ka liang pyrshah ka la thep ar kol ha ka kylla step.

Kumba ka paw ha kane ka jingïakhun jong ka wat khatduh, ka Meghalaya ka la don ha ka Group-B kaba kynthup lang ïa ka Goa, Delhi, Kerala, Tamil Nadu bad ka Odisha. Kin don tang saw tylli ki kynhun kiba wan ha ki kyrdan shakhmat na ki ar tylli group kin ïoh rung sha ka quarter-final.

Haba phai sha kane ka jingïakhun baroh ar ki kynhun ki la pyrshang ban ïalehkai bha naduh kaba sdang ha kaba ki la ïoh katto katne ki kabu kiba biang. Ka Tamil Nadu ka la ïoh ban pynkhih jar nyng-kong eh lyngba u Pandiyan Sinivasan ha ka minit kaba 28. Shwa ban kut ka jingïalehkai jong ka kylla step, kane ka kynhun ka la thep biang sa shi kol lyngba u Alexander Romario Jesuraj (45+2) na ka bynta ban tam da 2-0 kol ïa ka Meghalaya.

Wat la ka Meghalaya hapoh ka jingïalam u Bah Hering Shangpliang ka la wanphai da ka jingkhlaiñ bor ha ka kylla miet hadien ba ka la pynmih da u Khraw Kupar Jana ha ka jaka u Aibiang Mame Nongneng bad u Fairming Suting ha ka jaka u Baïaikara Swer. Kumta kane ka kynhun ka la pyrshang ban ïakhun tyngeh bad dei ha ka minit kaba 50 ka la lah ban pynphai kylla shi kol lyngba u Damanbhalang. Hadien katto katne por une u rangïalehkai shakhmat u la thep biang sa shi kol ha ka minit kaba 69 na ka bynta ban ïakhaid mar ar kol.

Hadien kane ka jingïakhaid, ka Meghalaya ka la bujli rangïalehkai ha ki bynta shakhmat da u Deibormame Tongper ha ka jaka u Donlad Diengdoh bad kane ka jingïakhaid ka la ïai neh haduh kaba kut na ka bynta ban ïasam mar shi poiñ.

Kham ha shwa, ka Kerala ka la pynliem ïa ka kynhun kaba wan ba-ar ha ka aïom ïalehkai 2023-24, ka Goa da 4-3 kol.

Ka Meghalaya kan pynkhreh ïa ka jingïakhun ba ar pyrshah ïa ka Kerala ha ka Sngi Ba-ar ha ka por 7:30 mynmiet.