Shillong, Nohprah 15
Ka kynhun jong ki ‘rang bad ki ‘thei ïalehkai jong ka Mawsynram ki la ïoh ban rah ïa ka nam lahduh jong ka lympung ïalehkai 4th Senior Softball State Level Championship ba la pynlong da ka Meghalaya Softball Association.
Ka jinglah kine ar kynhun jong ka Mawsynram ka la wan hadien ba ki la lah ba kin pynliem noh ïa ki rangïalehkai ka Dkhai na East Jaiñtia Hills bad kumjuh ïa ka Mupliang na West Jaiñtia Hills, ha ka jingïakhun final kaba la long ha ka sngi Saitjaiñ ha Don Bosco Mini Stadium.
Ha katei ka jingïakhun final la wan ban sakhi da u Myntri ka tnat jngohkai ka Sorkar Jylla u Bah Paul Lyngdoh kum u kongsan, bad sakhi lang da u Working President lem bad u General Secretary ka Meghalaya State Olympic Association u Bah John F. Kharshiing bad Bah Finely L. Pariat, kumjuh u Fr. Anthony Kharkongor, Principal ka St Anthony’s HSS, lem bad ki dkhot nongkitkam jong ka MSA.
Ha ka jingïalang sam ïa ki khusnam, ka la don ruh ka jingsam ïa ki khusnam shimet kaba kynthup ïa ka nam Best Catcher na ka liang ki kynthei ka leit sha ka Philawanbiang Syiemlieh na Mawsynram bad u Nangkiewkupar Disar na Mawsynrsam, Best Hitter ha ka liang ki kynthei ka leit sha ka Eliza Lyngdoh na ka Mawsynram bad u Sandy Strong Kharchandy na ka Mawsynram, Best Pitcher ha ka liang ki kynthei ka leit sha ka Larishisha Phawa na ka Muliang West Jaiñtia Hills bad u Krishna Thapa na ka Dkhiah, East Jaiñtia Hills District.
