Islamabad, Nohprah:
U Myntri Rangbahduh barim ka Pakistan, Imran Khan ryngkat ka kurim, ka Bushra Bibi, ki la shah pynngat ha ka mukotduma bamsap kaba thymmai ha ka Sngi Palei. Ka mukotduma, kaba dei ka jingshah kynnoh bamsap kaba lai pyrshah ïa ki, ka ïaid sawdong ka jingthied ïa ki jingdeng Bulgari kiba rem dor, kiba la buh ha ka dor kaba tad palat, la iathuh ka khubor jong ka Dawn.
Kane ka jingjia ka la jia tang shi taïew hadien ba u nongseng jong ka Pakistan Tehreek-e-Insaf (PTI) bad kiwei-kiwei ki nongïalam jong kane seng ki la shah pynngat ha ki kyndon aiñ ha kaba ïadei bad ka jinghiar thma ïa ka General Headquarter jong ki shipai ha Rawalpindi ha ka jingïakhih ha ka 9 tarik Jymmang jong u snem ba la dep.
Wat la u Khan u la ïoh jamin na katei ka mukotduma ha ka Islamabad High Court mynshem bnai, hynrei u dang don ha patok namar bun tylli ki jingshah kynnoh, kaba sdang naduh ba la kem ïa u ha ka 5 tarik Nailur mynshem snem, kumba la ïathuh da ka Dawn. Ha ka Sngi Palei, u nongbishar jong ka Special Court Central-I, u Shahrukh Arjumand, u la pynïaid ïa katei ka jingbishar ha Adiala Jail, ha kaba la pyni ïa u Imran. Ka Bushra Bibi, kaba don jamin ha katei ka mukotduma, ka la wan mih ryngkat bad u nongïasaid aiñ.
U nongseng jong ka PTI bad ka kurim jong u, ka Bushra Bibi, ki la kyntait ïa ki jingkynnoh bamsap ba la pynngat pyrshah ïa ki. Hadien kata, ka iingbishar ka la khot ïa ki sakhi jong ka liang pynngat ha ka 18 tarik u Nohprah ban buh jingthoh ïa ki jingkren jong ki.
Kat kum ka khubor jong ka Dawn, kane ka dei ka jingmudui kaba hynñiew jong u Imran Khan bad mynshwa ka dei ha ka 10 tarik Jymmang, 2023 ha ka mukotduma Toshakhana kaba nyngkong pyrshah ïa u, ha u bnai Kyllalyngkot ha ka jingpynngat Toshakhana kaba ar sien; ha u bnai Rymphang ha ka pisa Pakistan (PKR) 190 million ka mukotduma bamsap; bad dang shen halor ka jingthombor ha ka GHQ.
Katba ïa ki jingpynshitom ïa u Khan ha ki ar tylli ki mukotduma Toshakhana ba la dep la pynsangeh noh. La pynngat ruh ïa u ha ka mukotduma cipher ha ka 13 tarik u Nohprah, 2023 bad ha ka mukotduma Iddat ha u Kyllalyngkot, hynrei hadien la pyllait noh na baroh ar tylli ki mukotduma.
Ka jingbishar ïa u Imran Khan bad ïa ka Bushra Bibi ha ka mukotduma PKR 190 million ka la poi sha ka kyrdan kaba khatduh, ha kaba kine ar ngut shi kurim ki la ai sakhi hakhmat ka Accountability Court ha kane ka taïew.
Kaba kham pawnam, ha ka mukotduma kaba dang shen, ka tnad tohkit jong ka sorkar pdeng (FIA) ka la kynnoh ba kitei ki arngut ki la bat ïa ka set jingdeng Bulgari kaba rem dor bha kaba la ai sngewbha da u nongïalam bar ri kaba kynthup ïa ka jingdeng ryndang, ki jingdeng shkor, ki jingdeng kti, bad ki sati ha ka dor kaba tad bha, da kaba ong ba ka la wanrah ïa ka jingduhnong kaba khraw haka tnum jong ka pisa.
