Sngewkhia ka ACHIK halor ka jingpyntrei ïa ka projek JJM, dawa tohkit

Katkum ka DPR kaba don bad ki, ka projek JJM ka shongdor kumba T.2,37,80,000, wat la mang tang T. 2,21,80,000 tyngka.

Tura, Nohprah 15

Ka Achik Conscious Holistically Integrated Krima (ACHIK), Dadenggre Unit ka la buh katto-katne ki jingkylli namar ka jingsngewkhia ha kaba ïadei bad ka jingpyntreikam ïa ka projek JJM ha ka shnong Dabigre kaba hap hapoh Dadenggre Sub-Division, West Garo Hills.

Kane ka jingujor ka la wan hadien ka jingleit jngoh jong ka kynhun sha katei ka shnong ha kaba ki la aiti nyngkong ïa ka projek baroh kawei bad kumno la kiar ïa ki jingtip ban pyni ïa ka jingpyndep jong ka projek.

“Da kaba pynshong nongrim ïa ki jingtip ba la ïoh lyngba ki kot RTI, ngi la leit sha shnong ban peit hi dalade kaei kaba jia bad kaei kaba la jia kham ha shuwa. Ki jingmih na kane ka jingjurip ki long kaba sngew shyrkhei haduh katta-katta bad ki kdew ïa ki jingbym ïaid ryntih kiba jur – ki bym lah bad kiba nym lah shah,” ong u President, u Kronosh Sangma.

Katkum ka DPR kaba don bad ki, ka projek JJM ka shongdor kumba T.2,37,80,000, wat la mang tang T. 2,21,80,000 tyngka.

Ha kane ka jingleit jurip, ka kynhun ka la sakhi ba katkum ka DPR, la dei ban shna ïa ka ‘RCC Pump House’ kaba shongdor T.6,72,700 bad ïa u ‘Power Line’ na ka bynta ka ‘Pump House’ kaba shongdor T.8,64,850.

“Haba ngi la leit, kine ki jingtei ba kongsan kim shym la don. Kaba sngewsih ka long ba ka RTI ka la kam thok ba kine ki projek ki la dep 100%. Kane ka projek, kaba la shna pynwandur ban pynbiang ïa ka ‘Power Line’ na bynta ka ‘Pump House’, la pynkynriah sha ka ‘Solar Pump System’. Kane ka jingkylla ba khlem jingbit ka la pynthut shi kat dei ïa ka jinglah jong ka rukom treikam ban pynbiang ïa ki jingdonkam um ha ki ïing ki sem,” ong u Secretary, u Akber Marak.

Ka ACHIK ka la kdew ba nalor ka ‘RCC Weir’, kaba la antad haduh T.16,25,100/-, la lap ba la shna ha ka rukom kaba duna dor bad ym katkum ki jingkheiñ ba la mynjur, katba dang ïakren shaphang ka jinglut kaba shaba palat kaba ïadei bad ka jingshna bad pyndep ïa ka jingkhang ba la shna da ka nar jong kynroh maw-it ‘Treatment Plant’ bad ka jingker jong ka.

“Ka jinglut baroh na ka bynta ka jingkhang ba la shna da ka nar ka long T.5,18,630 katba ka jingai rong ïa kajuh ka jingkhang (tang ar sien ka jingai rong) ka long T.56,287. Kine ki jingkheiñ ki la pynkyndit ïa ngi, kaba la buh jingkylli halor ka jinglong hok, ka jingshai bad ka jingtreikam jong ka rukom thied bad ka jingpyntreikam. Kum kine ki jinglut kiba palat dei ban khmih bniah bin-pa-bin ban pyntikna ïa ka jingkitkhlieh bad ka jingpyndonkam hok ïa ki jingdon-jingem,” pynpaw ka ACHIK.

Katkum ka ACHIK, ka bynta kaba kongsan eh, ka jingpyndep ïa ka FHTC ka la kham pynkyndit shuh-shuh haba ïadei bad kane.

“Ka jubab ka RTI ka pynpaw sarong ba 230 tylli ki longïing ha Dabigre la dep pynïasoh da ki ‘pipe’ um. Hynrei ka jingshisha bad ka jingphla na u Nokma ka Dabigre A’king ka pyni ïa ka dur kaba pher bak-ly-bak. Tang kumba 98 tylli ki longïing la pynbiang ïa ki jaka sam um, bad na kine, tang kumba 40 tylli ki longïing ki ïoh ïa ka um. Na ka bynta kiwei pat, kane ka projek kam dei eiei hynrei ka jingphohsniew kaba shyrkhei,” la pynsngew ka CSO.

Ki sngew ba ki jinglap ki kdew sha ka jingbamsap kaba jur, ka jingbym shimkhia, bad ka jingpynïaid bakla da ki kontraktor, ki kynhun jurip ba lai, bad ki ophisar kiba don bynta ha kane ka projek.

Ha kajuh ka por, ka ACHIK mynta ka la thoh shithi sha u EE ka tnad PHE ban dawa tohkit halor ki jingbym ïahap kiba ki la lap. Ki la dawa ruh ban phah weng bad pyndam mardor ïa ka laisen jong u kontraktor uba donkti halor kine kiei-kiei baroh. Ki la dawa ruh ïa ka jingtohkit kaba ha khlieh duh halor ki kam jong ki kynhun jurip ba lai bad ki ophisar jong ka tnad ba dei khmih.

“Nalor kata, ka lad jingpynbeit kaba kyrkieh ban pyntikna ba ka imlang-sahlang Dabigre kan ïoh ïa ki jingtei bad ka jingpynbiang um (kaba la kular ka long kaba donkam). Ngin sa pynsngew ïa kane ka mat sha ki bor ba ha khlieh duh ban pyntikna ïa ka jingkitkhlieh bad ka hok bad ym ban sngap jar”, ki la bynrap.