
Amlarem, Nohprah 16
Ka Amlanai TC ka la ïoh jingjop ha ka Upper Division, katba ka Shkynpersit bad Padu United ki la rung sha ka quarter final ha ka Lower Division Football Tournament ba la pynïaid da ka Amla-rem Sub Divisional Sports Association (ASSA) ha madan Mini Stadium Ladjaplem ha ka Lah Sngi U Blei.
Ha ka jingïalehkai jong ka Upper Division, ka Amlanai TC ka la pynliem noh ïa ka Trangblang da 2-0 kol. Kane ka nam jop ka la wan urlong lyngba ki ar kol ba la thep da u Bhalangki Mukhim ha ka minit kaba 31 & 51.
Ha ka jingïakhun pre-quarter final jong ka Lower Division, ka Shkynpersit ka la jop ïa ka Krangpamtadong lyngba ka tie-breaker da 4-3 kol hadien ba ka jingïalehkai ha ka por ba la buh ka la kut noh da ka jingïakhaid mar shi kol.
Wat la ka jingïakhun ka la long kaba ïakhaid bha, hynrei hadien shiteng kynta ka Krangpamtadong ka la ïoh ban pynkhih jar nyngkong eh lyngba u Hoijuh Sumer (30). Hadien ba la bteng ïa ka jingïakhun jong ka kylla miet ka Shkynpersit ka la lah ban pynphai kylla lyngba u Carlos N Sana (56) na ka bynta ban ïakhaid mar shi kol haduh kaba kut ka jingïalehkai.
Ha ka jingïalehkai kaba bud, ka Padu United ka la pynliem da d 3-1 kol ïa ka Amsalang SC. Ïa ki kol jong ka Padu la thep da u Skhemmon Pohthmi (6), Banjop Nongpluh (49) bad kawei lyngba ka penalty ha ka minit kaba 55. Katba ïa ka shi kol jong ka Amsalang la thep da u Samlyngdoh (32).